سندھ حکومت نےکورونا وائرس کے لیے 1ارب روپے کا خصوصی فنڈ قائم کردیا ہے ۔

تفصیلات کے مطابق سندھ حکومت نے کوروناوائرس کی وبا سے بچاو کے لیے اقدامات مزید بڑھانے کا فیصلہ کرتے ہوئے 1ارب روپے کا خصوصی فنڈ قائم کردیا ہے۔

ذرائع کا کہنا تھا کہ 1 ارب روپے کے خصوصی فنڈ سے کورونا وائر س سے متاثرہ افراد کے علاج اور آلات کی خریداری کے لیے انتظامات کیے جائینگے

ذرائع کا یہ بھی کہنا تھا کہ خصوصی فنڈ کے استعمال کے لیے 5رکنی کمیٹی بھی قائم کی گئی ہے جبکہ ابتدائی طور پر 1ارب روپے کا خصوصی فنڈ قائم کیاگیا ہے ضرورت پڑنے پر بڑھایا جائے گا۔

دفعہ 144 نافذ، سندھ میں جزوی لاک ڈاؤن شروع

ذرائع کا مزید کہنا تھا کہ سندھ حکومت کے کورونا وائرس ایمرجنسی فنڈ کے استعمال کے لیے کمیٹی میں معروف سماجی شخصیات فیصل ایدھی ڈاکٹر عبدالباری اور مشتاق چھاپرا اور چیف سیکریٹری کی سربراہی میں سیکریٹری محکمہ خزانہ بھی کمیٹی کا حصہ ہونگے۔

دوسری جانب سندھ حکومت نے تمام سرکاری دفاتر، شاپنگ مالز ، ریسٹورنٹس اور تفریحی مقامات سمیت متعدد  دیگر مقامات 15 روز کے لیے بند کرنے کا اعلان کردیا۔

وزیر اعلیٰ سندھ مراد علی شاہ کی زیر صدارت ہونے والے اجلاس میں کورونا وائرس کے پیش نظر پندرہ روز کے لیےتمام سرکاری دفاتر،  ریسٹورینٹس ،شاپنگ مالز ، پبلک پارکس اور ساحل سمندر کو بند کرنے کا فیصلہ کیا گیاہے۔

وزیر اعلیٰ سندھ کا کہنا ہے کہ بندش کا اطلاق کل سے ہوگا تاہم سرکاری دفاتر پرسوں سے بند  ہوں گے جس کا نوٹیفکیشن چیف سیکریٹری جاری کریں گے۔

وزیر اعلیٰ سندھ مراد علی شاہ نے کہا کہ شاپنگ مالز میں  اگر گروسری کی دکانیں ہیں تو وہ کھلی رہیں گی جبکہ کریانے کی دکانیں  بھی چوبیس گھنٹے کھلی رہ سکتی ہیں اور کریانہ اسٹور سمیت سبزی ،مرغی اور مچھلی  کی مارکیٹس کھلی رہیں گی۔