وزیراعظم کی معاون خصوصی ڈاکٹر فردوس عاشق اعوان نے کہا ہے کہ حکومت نے گیس کی قیمتیں نہ بڑھانے کا فیصلہ کرلیا  ہے ۔

تفصیلات کے مطابق وزیراعظم عمران خان کی زیر صدارت کابینہ کی توانائی کمیٹی کے اجلاس میں عوام پر گیس کی مد میں کسی قسم کا اضافی بوجھ نہ ڈالنے کا فیصلہ کیا گیا ہے۔

اجلاس کے بعد وزیراعظم کی معاون خصوصی برائے اطلاعات و نشریات ڈاکٹر فردوس عاشق نے اجلاس بارے تفصیلات سے متعلق میڈیا کو آگاہ  کرتے ہوئے کہا کہ اجلاس میں عام صارفین کی مشکلات، مسائل اور ان کے تدارک کیلئے جامع حکمت عملی بنانے کا فیصلہ کیا گیا۔

فردوس عاشق اعوان  نے کہا کہ اجلاس میں وزیراعظم نے آئی ایم ایف معاہدہ کے تحت گیس کی قیمتیں بڑھانے کے عمل کو مؤخر، گیس کی قیمتوں میں استحکام کیلئے سوئی سدرن اور ناردرن گیس کمپنیز گراس کٹنگ، کفایت شعاری مہم اور گیس چوری کے حوالہ سے بروقت اور مؤثر اقدمات کو یقینی بنانے کی ہدایات دیتے ہوئے کہا کہ  دونوں سوئی گیس کمپنیاں معاشی ریلیف پیکیج پر عملدرآمد کیلئے فوری طور پر عوامی سہولت مراکز قائم کریں۔

بجلی اور گیس کی قیمتیں نہیں بڑھائیں گے، وفاقی کابینہ کا اصولی اتفاق

وزیراعظم کی معاون خصوصی نے یہ بھی کہا کہ اجلاس میں فیصلہ کیا گیا کہ گیس چوری کی روک تھام کیلئے فوری طور پر ادارہ جاتی اصلاحات متعارف کرائی جائیں، کابینہ کی توانائی کیمیٹی اصلاحاتی ایجنڈا ای سی سی میں لائے گی۔

ڈاکٹر فردوس عاشق اعوان کا کہنا تھا کہ وزیراعظم عمران خان نے وزارت توانائی کو ہدایت دی کہ دیہی علاقے کو گیس کی بلاتعطل فراہمی یقینی بنانے کیلئے صنعتی اور کمرشل سیکٹر میں گیس کا استعمال متبادل دن تجویز کئے جائیں تا کہ ایل این سی اور دیگر گیس کے ذرائع پر منتقل کیا جائے اور عام صارفین کو گیس فراہم کی جائے تا کہ عوام پر کوئی اور بوجھ نہیں ڈالیں گے۔

وزیراعظم کی معاون خصوصی ڈاکٹر فردوس عاشق اعوان کا مزید  کہنا تھا کہ  وزیراعظم نے معاشی ریلیف پیکیج پر فوری عملدرآمد کیلئے دونوں کمپنیاں صارفین سہولیات مرکز بنانے کی ہدایات دیں تا کہ معاشی ریلیف پیکیج پر تیزی سے عملدرآمد یقینی ہو سکے۔