وزیراعظم عمران خان نے کہا ہے کہ کورونا وائرس کی وباء کے پیش نظر حکومت مزدور طبقہ کے لیے خصوصی ریلیف فراہم کر رہی ہے اور اور ان کو اس صورتحال میں ریلیف ملے گا ۔

تفصیلات کے مطابق وزیراعظم عمران خان کی زیر صدار ت کورونا وائرس کے پیش نظر معیشت پر پڑنے والے اثرات خصوصاً تعمیرات کے شعبے  کے حوالے سے  اعلی سطح اجلاس ہوا، جس میں تعمیرات کے شعبہ کو فروغ دینے کے لیے ٹیکس امور پر بھی تفصیلی غورکیا گیا۔

اجلاس کو بریفنگ دیتے ہوئے چیئرمین نیا پاکستان ہاؤسنگ اتھارٹی نے آگاہ کیا کہ تعمیرات سیکٹر کی بحالی کے لیے ایک جامع پیکج ترتیب دیا گیا ہے جس میں صوبوں سے بھی مشاورت کی گئی ہے۔  اجلاس کو بتایا گیاکہ تعمیرات سے متعلقہ ترقیاتی اداروں (ڈویلپمنٹ اتھارٹیز)  سے اجازت نامے کے حصول  اور دیگر سرکاری امور کو آسان بنا دیا گیا ہے۔

وزیراعظم نے کہا کہ کورونا وائرس کی وباء کے پیش نظر مزدور طبقہ سب سے زیادہ توجہ طلب ہے اور حکومت مزدور طبقہ کے لیے خصوصی ریلیف فراہم کر رہی ہے۔

توانائی کے شعبے سے متعلقہ مسائل کا حل حکومت کی اولین ترجیح ہے، وزیرِ اعظم

اجلاس میں وزیراعظم عمران خان نے اس بات پر زوردیا کے تعمیرات کے شعبے کو مراعات فراہم کرنے سے روزگار کے مواقع بڑھیں گے، معیشت مضبوط ہو گی اور مزدور طبقے کو اس صورتحال میں ریلیف ملے گا۔

اجلاس میں وزیر معاشی امور حماد اظہر،  وزیر منصوبہ بندی اسد عمر،  وزیر برائے فوڈ سیکیورٹی مخدوم خسرو بختیار،  مشیر خزانہ ڈاکٹر عبدالحفیظ شیخ،  مشیر تجارت عبدالرزاق داؤد، مشیر ادارہ جاتی اصلاحات ڈاکٹر عشرت حسین،  چیئرمین نیا پاکستان ہاؤسنگ اتھارٹی لیفٹیننٹ جنرل (ر)  انور علی حیدر، قائم مقام چیرپرسن ایف بی آر نوشین جاوید امجد اور سینئر افسران شریک ہوئے۔

یاد رہے کہ ملک میں کورونا وائرس کے آج 157 افراد میں مہلک وائرس کی تشخیص ہوئی جن میں سندھ سے 54  ، خیبرپختونخوا میں 23 ،بلوچستان میں 5، پنجاب میں 69، اسلام آباد میں 4 اور گلگت بلتستان میں 4 کورونا وائرس کے کیسز کی تصدیق ہوئی ہے جس کے بعد ملک بھر میں متاثرہ افراد کی تعداد 2382 تک پہنچ گئی ہے۔