رانا ثناءاللہ کا کہنا ہے کہ شیخ رشید کے نیب میں دو موکل عمران نیازی اور شہزاد اکبر ہیں۔

مسلم لیگ ن پنجاب کےصدر رانا ثنا اللہ نے کہا کہ شیخ رشید کا نیب کو شہبازشریف کی گرفتاری کا حکم نیب نیازی گٹھ جوڑ کی تصدیق ہے ، اور یہ تصدیق بھی ہوگئی کہ2 سال سے نیب کو سیاسی انتقام کے لیے استعمال کیاجارہا ہے۔

وزیر ریلوے شیخ رشید احمد کے بیان پر ردعمل کا اظہار کرتے ہوئے رانا ثناءاللہ نے کہا کہ شہبازشریف کے تعمیرکردہ یورالوجی اسپتال میں کورونا پرسیاست پر شیخ رشید کو شرم آنی چاہیے۔

 ‎رانا ثنا اللہ نے کہا کہ ہم نے جھوٹے الزامات کے باوجود جیلوں کا سامنا کیا ہے،کورونا کے بجائے  پوری حکومت شہبازشریف کے پیچھے ہے جبکہ شریف خاندان نے ہمیشہ قانون کی پاسداری کی ہے۔

انہوں نے مزید کہا کہ ملک نیب نیازی گٹھ جوڑاورشیخ رشید جیسےلوگوں کا مزید بوجھ اٹھانے کا متحمل نہیں ہوسکتا۔