پاکستان مسلم لیگ (ن) کی ترجمان مریم اورنگزیب نے کہا ہے کہ آٹاچینی چوروں کے شور مچانے سے عمران صاحب کی اربوں روپے کی ڈکیتی چھپ نہیں سکتی جبکہ عوام کو ریلیف پہنچانے میں کرپٹ نالائق حکومت مکمل فیل ہوچکی ہے۔

تفصیلات کے مطابق پاکستان مسلم لیگ (ن) کی ترجمان مریم اورنگزیب نے معاون خصوصی اطلاعات ڈاکٹر فردوس عاشق اعوان کے بیان پر ردعمل دیتے ہوئے کہنا ہے کہ غریب، مزدور ریلیف، راشن اور امداد کے منتظر ہیں، کرپٹ نالائق ٹولہ شہبازشریف کے غم میں مبتلا ہے ۔

اپنے بیان میں پاکستان مسلم لیگ (ن) کی ترجمان نے کہا کہ دیہاڑی دار عمران صاحب کویاد کررہے ہیں، عمران صاحب شہبازشریف، شہبازشریف کررہے ہیں جبکہ تنہائی ، مایوسی اور ناکامی کا شکار آٹا اور چینی چور ہیں جن کو عوام مسترد کر چکی ہے۔

مریم اورنگزیب نے یہ بھی کہا کہ شہبازشریف کے بیان پر آٹاچینی چوروں کی چیخیں نکل رہی ہیں آٹا ، چینی چور عوام کے مجرم ہیں اور شہباز شریف عوام کے مجرموں کو معاف نہیں کریں گے۔

پاکستان مسلم لیگ (ن) کی ترجمان کا کہنا تھا کہ شہباز شریف کی کامیابی ہے کہ آٹا چینی چور رنگے ہاتھوں پکڑے جانے پر شہبازشریف کے خلاف شور مچارہے ہیں جبکہ وزیراعظم ، وزراءاور حکومتی ترجمان دن رات صرف ان کی یاد میں روتے رہتے ہیں۔

شہباز شریف کے نیب میں پیش نہ ہو نے کی وجہ مریم اورنگزیب نے بتا دی

مریم اورنگزیب کا یہ بھی کہنا تھا کہ عمران صاحب کی ایمانداری کی چادر میں سے عوام کا چوری شدہ آٹا اور چینی برآمد ہوئی جبکہ غریبوں کے ماسک، دوائی پر مال بنانے والے پکڑے گئے ہیں، اس لئے شور تو بنتا ہے لیکن وزیراعظم ، وزیراعلیٰ اور کابینہ عوام کے آٹا اور چینی چوری میں سب جیل جانے والے ہیں۔

انھوں نے کہا کہ آٹا اور چینی چوروں نے ڈاکٹرز کے سر پھاڑے اور شہباز شریف نے اُن کی حفاظتی کٹس مہیا کیں آٹا چینی چور نالائق اور نااہل حکومت شور مچانے اور رونے سے اپنی چوری نہیں چھپا سکتی نواز شریف اور شہباز شریف کو عوام دعائیں اور آٹا چینی چوروں کو بددعائیں دے رہے ہیں۔

پاکستان مسلم لیگ (ن) کی ترجمان مریم اورنگزیب نے مزید کہا کہ کنفیوزڈ، کرپٹ، نالائق اور نااہل وزیراعظم نے عوام کو کنفیوز کر رکھا ہے وزیراعظم، وزراء اور حکومتی ترجمانوں کو کورونا کے مریضوں کا فکر نہیں، ان کی ترجیح صرف شہباز شریف ہے ۔