چودھری شجاعت حسین کا کہنا ہے کہ وزیراعظم عمران خان اکیلا اس قدرتی آفت کا مقابلہ نہیں کر سکتا سب کو اپنی حفاظت خود کرنا ہوگی۔

تفصیلات کے مطابق پاکستان مسلم لیگ ق کے صدر چودھری شجاعت حسین نے مو جودہ حالات پر تبصرہ کر تے ہوئے کہا ہے کہ صاحب حیثیت لوگ مزدوروں کو کھانا کھلانے سے غریب نہیں ہوجائیں گے،سستی چیزیں مہنگی بیچنے والے اللہ سے ڈریں،  اپنے ہمسایوں کا خیال رکھیں اور سفید پوش طبقہ کی دل کھول کر مدد کریں۔

پاکستان مسلم لیگ ق کے صدر نے کہا کہ صاحب حیثیت افراد سے میں کہوں گا کہ وہ کم از کم دو خاندانوں کا راشن اپنے ذمہ لیں۔

چودھری شجاعت حسین کاکہناہے کہ سیاسی لیڈر سیاسی بیان بازی کرنے کی کوشش نہ کریں، یہ سیاسی بیان بازی کا وقت نہیں،ایسا نہ ہو کہ وہ اللہ کی پکڑ میں مبتلا ہو جائیں۔

انھوں نے مزید کہا کہ جو لوگوں کی مجبوریوں سے فائدہ اٹھاتے ہیں اور سستی چیزیں مہنگے داموں فروخت کرتے ہیں، ایسی حرام کمائی ان کے کسی کام نہیں آئے گی۔