وزیرِ اطلاعات پنجاب فیاض الحسن چوہان نے کہا ہے کہ  پنجاب حکومت نے پیر سے آٹو انڈسٹری اور شاپنگ مالز کھولنےکا فیصلہ کرلیا ہے۔

تفصیلات کے مطابق وزیراطلاعات فیاض الحسن چوہان نے پریس کانفرنس کرتے ہوئے بتایا ہے کہ پبلک ٹرانسپورٹ بھی طے شدہ ایس او پیز کے ساتھ  چلیں گی۔

فیاض الحسن چوہان نے کہا ہے کہ لاک ڈاؤن میں نرمی کا فیصلہ عوامی سہولت کے تحت کیا گیا ہے کیونکہ لاک ڈاؤن میں سختی سےلوگوں کی مشکلات میں اضافہ ہوتا ہے۔

انہوں نے کہا ہے کہ لاک ڈاؤن میں نرمی یا سختی عوامی ردعمل کودیکھ کرہوگی،ایس او پیز پرعمل کرتے ہوئےعوام روز مرہ امور سرانجام دے سکتے ہیں۔

فیاض چوہان نے مزید کہا ہے کہ کورونا سے بچاؤ صرف سماجی دوری پر عمل کرنے سے ہی ممکن ہے اور پنجاب میں حکومتی ایس او پیز پرعمل کی صورتحال خوش آئند ہے۔

شیخ رشید نے نیب قانون میں ترمیم پر ساتھ نہ دینے کا اعلان کردیا

انہوں نے کہا ہے کہ امید ہے عوام ذمہ داری کا ثبوت دیتے ہوئے لاک ڈاؤن میں نرمی سے فائدہ اٹھائیں گے۔

یاد رہے کہ اس سے قبل کیبنٹ کمیٹی برائے کورونا کا اجلاس  ہوا، اجلاس وزیر اعلی پنجاب عثمان بزدار کی زیر صدارت ہوا، اجلاس میں آئی ایس آئی، بیوروکریسی اور وزرا موجود رہے۔

اجلاس کے متعلق فیاض الحسن چوہان نے بتایا کہ ایس او پی کے تحت کرسچن کمیونیٹی اتوار کو چرچس میں عبادات کرسکے گی اور یہ فیصلہ اجلاس میں باہمی مشاورت سے کیا گیا ہے۔

انہوں نے بتایا کہ پنجاب میں انٹر سٹی ٹرانسپورٹ کو کھولنے کا فیصلہ کیا گیا  ہے، انٹر سٹی ٹرانسپورٹ بیس فیصد کرائے کی کمی کے ساتھ کھولے جائیں گے اور یہ فیصلہ پیٹرول کی قیمتوں کے باعث یہ فیصلہ کیا گیا ہے۔

ان کا مزید کہنا تھا کہ پاور لومز،، شاپنگ مالز ، اٹو موبائل اور موبائل انڈسٹری سے متعلق شعبوں کو بھی کھولنے کی اجازت دے دی گئی ہے۔