کراچی میں سمندری ہوائیں بحال ہونے کے بعد گرمی کی شدت میں کچھ کمی واقع ہورہی ہے، تاہم رمضان المبارک میں بھی شہری آج کے دن ہیٹ ویو کا سامنا کررہے ہیں۔

ڈائریکٹر محکمہ موسمیات سردار سرفراز کے مطابق شہرقائد میں آج سمندری ہوائیں چل رہی ہیں مگر سمندری ہواؤں کی رفتار کم ہے۔

ذرائع کے مطابق  کراچی آج بھی ہیٹ ویو کی لپیٹ میں ہے جبکہ توقع کی جارہی ہے کہ  ہیٹ ویو کا آج یہ آخری دن ہو اور کل سے درجہ حرارت میں کمی کا امکان ہے۔

شہر میں آج کم سے کم درجہ حرارت 27 سینٹی گریڈ ریکارڈ کیا گیا ہے اور زیادہ سے زیادہ درجہ حرارت 38 سے 40 ڈگری سینٹی گریڈ کے درمیان رہنے کا امکان ہے

ہیٹ ویو کے پیش نظر طبی عملے کی چھٹیاں بھی منسوخ کر دی گئی تھی اور تمام اسپتالوں میں ہیٹ ویو ایمرجنسی وارڈ قائم کرنے کا فیصلہ کیا گیا ۔

واضح رہے کہ محکمۂ موسمیات نے شہریوں کو خبردارکیا تھا کہ  5 سے 8 مئی کے دوران شہر ہیٹ ویو کی لپیٹ میں رہ سکتا ہے۔