شیخ رشید نے کہا کہ لوڈ بڑھا تو عید اسپیشل ٹرین بھی چلا سکتے ہیں، ہمیں اس سے کوئی فائدہ نہیں بلکہ نقصان ہے، مگر ہم حکومت ہیں اور عوام کا فائدہ دیکھتے ہیں۔

تفصیلات کے مطابق پشاور میں پریس کانفرنس کرتے ہوئے وفاقی وزیرِ ریلوے شیخ رشید احمد نے کہا کہ کل ہمیں ٹرینیں چلانے کی اجازت ملی ہے، ہم 30 ٹرینیں چلانے جا رہے ہیں۔

وفاقی وزیرِ کا کہناہے کہ شہباز شریف کا کیس بہت سنجیدہ ہے، 31 جولائی تک نیب دونوں طرف جھاڑو پھیرے گا۔

انہوں نے کہا کہ پشاور سے صرف 3 ٹرینیں چلائیں گے، ہمارے پختون بہن بھائی ٹرین میں زیادہ سفر کرتے ہیں، ضرورت محسوس ہوئی تو ٹرینوں کی تعداد میں اضافہ کریں گے۔

شیخ رشید نے کہا کہ ہم ایس او پیز کو مدِ نظر رکھ کر ٹرین کو چلائیں گے، ٹکٹوں میں کوئی رعایت نہیں، ہمیں بڑی مشکل سے ٹرینیں چلانے کی اجازت ملی ہے۔