وزیرخارجہ مخدوم شاہ محمود قریشی نے کہا ہے کہ حکومت موجودہ وبائی تناظر میں کسانوں کو درپیش مسائل کے حل کیلئے خصوصی اقدامات کر رہی ہے ۔

تفصیلات کے مطابق کسان اتحاد کے مرکزی صدر  خالد محمود کھوکھر کی وزارت خارجہ میں وزیر خارجہ مخدوم شاہ محمود قریشی سے ملاقات ہوئی جس میں کورونا عالمی وبائی صورتحال کے پیشِ نظر کسانوں کو درپیش مشکلات کے حوالے سے تبادلہ ء خیال کیا گیا۔

اس موقع پر کسان اتحاد کے صدر خالد محمود کھوکھر نے کہا کہ موجودہ وبائی صورتحال نے کسانوں کے مسائل میں مزید اضافہ کر دیا ہے، ہمیں توقع ہے کہ حکومت اس بجٹ میں کسانوں کو درپیش مشکلات کے ازالے کیلئے خصوصی اقدامات کرے گی۔

شاہ محمود قریشی نے کہا کہ پاکستان ایک زرعی ملک ہے ہماری معاشی خوشحالی زراعت کے شعبے سے منسلک ہے، ہميں کسانوں کو درپیش مشکلات کا مکمل ادراک ہے۔

وزیرخارجہ مخدوم شاہ محمود قریشی نے مزید کہا کہ بجٹ میں زرعی شعبے کی بہتری کو خصوصی طور پر پیش نظر رکھا جا رہا ہے، حالیہ بجٹ، انشا اللہ کسانوں کے لیے بہتری کی نوید ثابت ہو گا

ملاقات میں کسان اتحاد کے مرکزی صدر خالد محمود کھوکھر نے کسانوں کی معاشی بہتری کی طرف خصوصی توجہ مرکوز کرنے پر وزیر خارجہ کا شکریہ ادا کیا۔

زراعت اور کسانوں کا تحفظ حکومت کی اولین ترجیح ہے، وزیراعظم

کسان اتحاد کے مرکزی صدر  خالد محمود کھوکھر کی وزیر خارجہ مخدوم شاہ محمود قریشی سے ہونے والی ملاقات میں پارلیمانی سیکرٹری خزانہ زین قریشی بھی شریک ہوئے۔

واضح رہے اس سے قبل ملک میں ٹڈی دل کے حملے سے نمٹنے کے لئے وزیرِ اعظم عمران خان کی زیر صدارت  اعلیٰ سطحی اجلاس ہوا تھا۔

اجلاس میں وزیرِ اعظم کو ملک کے مختلف حصوں میں ٹڈی دل کے خطرے اور ٹڈی دل کے خاتمے کے لیے  ترتیب دیے گئے نیشنل ایکشن پلان کے حوالے سے تفصیلی بریفنگ دی گئی۔

بریفنگ میں کہا گیا تھا کہ مجوزہ نیشنل ایکشن پلان میں وفاقی  ، صوبائی اور ضلعوں کی سطح پر ذمہ داریوں کا تعین کردیا گیاجبکہ نیشنل ڈیزاسٹر منیجمنٹ اتھارٹی، صوبائی ڈیزاسٹر منیجمنٹ اتھارٹیز، وفاقی و صوبائی محکمہ جات کی ذمہ داریاں مقرر کر دی گئی ہیں۔