وزیر اعظم عمران خان 2 روزہ سندھ کے دورے پر کراچی پہنچ گئے۔

تفصیلات کے مطابق سندھ کے 2 روزہ دورے کے دوران وزیر اعظم عمران خان گورنر ہاؤس پہنچے اور آج رات وہ گورنر ہاؤس میں قیام کریں گے۔

گورنر سندھ عمران اسماعیل اور وزیر اعلیٰ سندھ مراد علی شاہ سےملاقاتیں ہوں گی جبکہ وزیراعظم گورنر ہاؤس میں کوروناسے متاثرہ مریضوں کیلئےقائم کیے گئے موبائل اسپتال کا معائنہ کریں گے۔

ذرائع کا کہنا ہے کہ وزیراعظم عمران خان نے گورنر ہاؤس پہنچتے ہی پی ٹی آئی سندھ کور کمیٹی کا اجلاس بلا لیا جس میں پی ٹی آئی رکن سندھ اسمبلی اور سندھ کے پارٹی رہنما وزیراعظم کو کوروناوائرس اور ان کے حلقہ جات میں درپیش مسائل سے آگاہ کریں گے۔

وزیراعظم عمران خان آج کراچی پہنچیں گے

ذرائع کا یہ بھی کہنا ہے کہ پی ٹی آئی سندھ کور کمیٹی اجلاس میں گورنر سندھ عمران اسماعیل وزیر اعظم کو ٹائیگر فورس سے متعلق اقدامات کی بریفنگ بھی دیں گے۔

ذرائع کے مطابق وزیراعظم سے بدھ کی صبح پی ٹی آئی ارکان اسمبلی کے علاوہ ایم کیو ایم پاکستان اور جی ڈی اے کا وفد بھی ملاقات کرے گا۔

ذرائع نے بتایا کہ بدھ کی دوپہر وزیر اعظم لاڑکانہ پہنچیں گے جہاں وہ احساس پروگرام سینٹر کے دورے کے علاوہ سیاسی رہنماؤں سے ملاقاتیں بھی کریں گے جبکہ لاڑکانہ دورےکے بعد  وزیراعظم بدھ  کو واپس اسلام آباد چلے جائیں گے۔