وزیرِ اعظم عمران خان نے کہا ہے کہ بجٹ میں  کورونا وائرس سے متاثرہ صنعتی شعبے کی بحالی و فروغ ترجیح ہے۔

تفصیلات کے  مطابق وزیرِاعظم عمران خان کی زیر صدارت آئندہ مالی سال کے مجوزہ بجٹ کےحوالے سے اعلیٰ سطحی اجلاس ہوا جس میں مشیر خزانہ ڈاکٹر عبدالحفیظ شیخ کی رواں مالی سال کے محصولات، اخراجات  اور آئندہ بجٹ کے تخمینوں کا خاکہ پیش کیا۔

اجلاس میں مشیر خزانہ نے آئندہ مالی سال کے لئے بجٹ کی ترجیحات   پر بھی وزیرِ اعظم کو تفصیلی طور پر بریف کیا اور وزیرِ اعظم کو ایف بی آر  میں اصلاحات کے حوالے سے اب تک کی پیش رفت پر بھی بریفنگ دی گئی۔

وزیرِ اعظم نے کہا کہ صنعتی عمل کا فروغ اور کاروباری برادری کو ہر ممکن آسانیاں فراہم کرنا موجودہ حکومت کی اولین ترجیح ہے۔

عمران خان نے یہ بھی کہا کہ آئندہ بجٹ میں غیر ترقیاتی اخراجات میں کمی لانے  پر بھی خصوصی توجہ دی جائے جبکہ عوام پر پڑنے والے  غیر ضروری حکومتی اخراجات کا بوجھ کم کرنے  پر خصوصی توجہ دی جائے۔

شریف فیملی کی چوری پکڑی گئی ، وزیراعظم

وزیرِ اعظم عمران خان نے مزید کہا کہ پبلک پرائیویٹ پارٹنر شپ کا فروغ وقت کی اہم ضرورت ہے، ترقیاتی اخراجات کے حوالے سے تخمینوں کو صوبوں  کی مشاورت سے حتمی شکل دی جائے۔

واضح رہے اس سے قبل وزیراعظم سے انصاف ڈاکٹرز فورم کے وفد نے ملاقات کی، اس دوران کورونا  کی صورت حال اور روک تھام کی حکومتی حکمت عملی پر مشاورت ہوئی، ملکی ڈاکٹروں اور ہیلتھ کئیر اسٹاف کے کردار پر بھی خصوصی بات چیت ہوئی، آئی ڈی ایف نے حکومت کی اصلاحات پر مکمل اعتماد کا اظہار کیا۔

اس موقع پر وزیراعظم عمران خان کا کہنا تھا کہ کورونا کے خلاف ڈاکٹروں اور طبی عملےکی خدمات لائق تحسین ہیں، پوری قوم ان کو خراجِ تحسین پیش کرتی ہے، ماضی میں ہیلتھ سیکٹر کو نظر انداز کیا گیا۔