وزیر اعظم  عمران خان نے ٹڈی دل کے تدارک کے لئے  حکومت پنجاب ہر ممکنہ اقدام کرنے کی ہدایت کردی۔

تفصیلات کے مطابق وزیراعظم عمران خان   کی زیر صدارت صوبہ  پنجاب میں  ٹڈی دل کے تدارک کے حوالے سے اقدامات پر اعلیٰ سطحی  اجلاس ہوا۔

اجلاس  میں وفاقی وزیر براے نیشنل فوڈ سیکورٹی سید فخر امام،  وزیر اعلی پنجاب سردار عثمان بزدار اور  دیگر سینئر حکام شریک ہوئے۔

ڈ ی جی پی ڈی ایم اے نے ٹڈی دل کے حملے سے نمٹنے کے لئے صوبائی اور ضلعی انتظامیہ کی مدد سے کیے جانے والے اقدامات پر تفصیلی بریفنگ  دی ۔

بریفنگ میں انہوں نے بتایا کہ صوبے بھر میں ٹڈی  دل کے حملے کو جدید مشینری کے استعمال  اور جامع حکمت عملی سے  بڑی حد تک روکا گیا  ہے ۔

وزیر اعظم کو بتایا گیا کہ صوبائی حکومت  کی جانب سے ٹڈی دل کی روک تھام و تدارک کے لئے استعداد کار  میں خاطر خواہ اضافہ کیا گیا ہے۔

وزیر اعظم نے ٹڈی دل کے تدارک کے لیے صوبائی حکومت کی جامع حکمت عملی  اور اقدامات  پر اطمینان کا اظہار کیا۔

انہوں نے ہدایت کی کہ ٹڈی دل کے چیلنج سے نمٹنے کے لئے ہر ممکنہ اقدام کیا جائے  تاکہ کسانوں کی بیش قیمت فصلوں کو اس قدرتی آفت سے تحفظ فراہم کیا جا سکے۔

وزیر اعظم نے کہاکہ  کسانوں کو اس عمل میں شریک کرنے پر بھی خصوصی توجہ دی جائے۔