چیئرمین برابری پارٹی پاکستان جواد احمد نے کہا ہے کہ بجٹ سے عوام کا دم گھٹنے لگا ہے۔

تفصیلات کے مطابق چیئرمین برابری پارٹی پاکستان جواد احمد نے پارٹی ورکرز سے ویڈیو لنک گفتگو میں کہا ہے کہ بجٹ سے عوام کا دم گھٹنے لگا ہے۔

جواد احمد نے کہا کہ پاکستان تحریک انصاف کی حکومت نے غیر متوازن بجٹ بناتے ہوئے تمام شعبوں کو نظر انداز کردیا جسکی وجہ سے اب ادویات مزید مہنگی ہوں گی اور سستے آٹے کی فراہمی عوام کے لئے خواب بن جائے گی۔

انہوں نے بتایا کہ  چینی، آٹا، گھی اور پٹرولیم  مافیا کے سربراہ حکومت کا حصہ ہیں وہ کیسے اپنے معاملات خراب  ہونے دیں گے۔

فواد چوہدری اور راجہ ریاض کی گفتگو پاکستان تحریک انصاف کی بیڈ گورنس کی عکاسی کرتی ہے کہ دیگر سیاسی جماعتوں کی طرح یہ بھی عوام کی خدمت کرنے میں ناکا م ثا بت ہوئے ہیں۔

ان کا کہنا تھا عمران خان عوام کی آنکھوں میں دھول جھونکنے سے گریز کریں کیونکہ  ان کے وعدوں اور دعووں کی ہنڈیا ں بیچ چوراہے پھوٹ چکی ہے۔

ان کا مزید کہنا تھا کہ پشاور ہائی کورٹ کے واضح احکامات کے باوجود ابھی تک عوام پٹرولیم  مصنوعات کی قیمتوں میں کمی سے مستفید نہیں ہوسکی ہے۔