وزیراعظم عمران خان نے کہا ہے کہ صوبہ بلوچستان کی سماجی و معاشی ترقی اولین ترجیحات میں شامل ہے۔

تفصیلات کے مطابق وزیراعظم عمران خان سے وزیر اعلیٰ بلوچستان جام کمال خان کی ملاقات ہوئی۔

ملاقات میں صوبہ بلوچستان کی مجموعی صورتحال،  خصوصا کورونا وائرس کی روک تھام کے حوالے سے اقدامات پر گفتگو کی گئی جبکہ صوبہ بلوچستان میں جاری ترقیاتی منصوبوں  سے متعلقہ امور پر تبادلہ خیا کیا گیا۔

اس موقع پر وزیراعظم عمران خان نے کہا کہ صوبہ بلوچستان کے عوام کی فلاح و بہبود اور صوبے کی سماجی و معاشی ترقی اولین ترجیحات میں شامل ہے جبکہ صوبائی حکومت  کو ہر ممکنہ تعاون  فراہم کیا جائے گا۔

عمران خان سے وزیر اعلیٰ بلوچستان سے ہونے والی ملاقات میں زبیدہ جلال، سردار اسرار خان ترین، خالد مگسی، سینیٹرز انوارالحق، احمد خان اور تاج آفریدی بھی شریک ہوئے۔

پوری قوم ڈاکٹروں کو خراج تحسین پیش کرتی ہے، وزیراعظم

واضح رہے اس سے قبل وزیراعظم سے انصاف ڈاکٹرز فورم کے وفد نے ملاقات کی، اس دوران کورونا  کی صورت حال اور روک تھام کی حکومتی حکمت عملی پر مشاورت ہوئی، ملکی ڈاکٹروں اور ہیلتھ کئیر اسٹاف کے کردار پر بھی خصوصی بات چیت ہوئی، آئی ڈی ایف نے حکومت کی اصلاحات پر مکمل اعتماد کا اظہار کیا۔

اس موقع پر وزیراعظم عمران خان کا کہنا تھا کہ کورونا کے خلاف ڈاکٹروں اور طبی عملےکی خدمات لائق تحسین ہیں، پوری قوم ان کو خراجِ تحسین پیش کرتی ہے، ماضی میں ہیلتھ سیکٹر کو نظر انداز کیا گیا۔