وزیراطلاعات پنجاب فیاض الحسن چوہان کا کہنا ہے کہ  متحدہ اپوزیشن کے بکھرے ہوئے ہجوم نے اپنے اپنے ادوار میں پوری دلجمعی اور خشوع وخضوع کے ساتھ پاکستان کو لوٹا ہے۔

تفصیلات کے مطابق  فیاض الحسن چوہان  نے وزیراعظم عمران خان اور ان کی پوری ٹیم کو وفاقی بجٹ منظور  ہونے پر مبارکباد پیش کرتے ہوئے کہا کہ  متحدہ اپوزیشن کا ایڑی چوٹی کا زور کسی کام نہ آ سکا۔

وزیر اطلاعات پنجاب نے مزید کہا کہ  انشاء اللہ وزیراعلیٰ پنجاب سردار عثمان بزدار کی قیادت میں پنجاب کا بجٹ بھی منظور ہو گا۔

انہوں نے کہا کہ وزیراعظم عمران خان کی صورت میں احتساب کا تازیانہ متحدہ اپوزیشن کے سروں پر برس رہا ہے۔  ہر ڈیڑھ مہینے بعد ’حکومت جانے والی ہے‘ کا راگ الاپ کر رسوا ہونا متحدہ اپوزیشن کا شوق بن چکاہے۔