آرمی چیف جنرل قمر جاوید باجوہ کی جانب سے مفتی نعیم کے انتقال پر گہرے دکھ اور افسوس کا اظہار کیا گیا ہے۔

پاک فوج کے شعبہ تعلقات عامہ ( آئی ایس پی آر) کے مطابق آرمی چیف جنرل قمر جاوید باجوہ نے  جامعہ بنوریہ کراچی کے مہتمم مفتی نعیم کے انتقال پر گہرے دکھ اور افسوس کا اظہار کیا ہے۔

آرمی چیف نے کہا ہے کہ اللہ تعالی ان کی مغفرت فرمائے اور اُن کے اہلخانہ کو صبرِ جمیل عطا فرمائے۔

دوسری جانب صدر مملکت ڈاکٹر عارف علوی نے ممتاز عالم دین مفتی نعیم کے انتقال پر گہرے دکھ اور افسوس کا اظہار کرتے ہوئے کہا ہے کہ مرحوم مفتی نعیم  کی دینی خدمات ہمیشہ یاد رکھی جائیں گی۔

ڈاکٹر عارف علوی نےغمزدہ خاندان سے تعزیت کا اظہار کرتے ہوئے مرحوم کے درجات کی بلندی اور غمزدہ خاندان کے لئے صبر جمیل کی دعاء بھی کی۔

وزیر اعظم عمران خان نے بھی ممتاز عالم دین مفتی نعیم کے انتقال پر گہرے دکھ اور افسوس کا اظہار کیا  ہے۔

‏وزیر خارجہ شاہ محمود قریشی نے بھی جامعہ بنوریہ کے مہتمم مفتی نعیم کے انتقال پر اظہار تعزیت کیا ہے۔

شاہ محمود قریشی نے کہا کہ مفتی نعیم کے انتقال پر گہرا دُکھ اور افسوس ہے، مفتی نعیم بین المذاہب ہم آہنگی کے بہت بڑے داعی تھے ان کی دین کے لیے خدمات کو تا دیر یاد رکھا جائے گا۔

شاہ محمود قریشی نے دعا کی کہ اللہ تعالی ان کی مغفرت فرمائے اور اُن کے پسماندگان اور محبین کو صبرِ جمیل عطا فرمائے۔