ڈی جی رینجرز سندھ میجر جنرل عمر بخاری کا کہنا ہے اسٹاک ایکسینج پر حملہ کرنے والے دہشتگردوں  کو آٹھ منٹ کی کارروائی میں ہلاک کردیا گیا۔

کراچی پولیس چیف غلام نبی میمن کے ہمراہ  پاکستان اسٹاک ایکسچینج پر حملے کے حوالے سے پریس بریفنگ میں  ڈی جی رینجرز سندھ نے بتایا کہ  صبح 10 بجکر 2 منٹ پر گاڑی میں سوار دہشت گرد پہنچے تھے جبکہ  واقعے کا اختتام 10 بجکر 10 منٹ پر ہوگیا تھا۔

میجر جنرل عمر بخاری نے کہا کہ  آٹھ منٹ میں دہشت گردوں کا مقابلہ کرکے انہیں مار دیا گیا۔ دہشت گردوں کو احداف حاصل نہیں کرنے دیے گئے۔

ڈی رینجرز کا کہنا تھا کہ  پہلی چیک پوسٹ سے دہشت گردوں نے داخل ہونے کی کوشش کی۔ دو دہشت گرد پہلے مقابلے میں ہی مارے گئے جبکہ اس میں ایک پولیس کے سب انسپکٹر بھی شہید ہوئے۔

انہوں نے کہا کہ  رینجرز  اور پولیس اور پاکستان اسٹاک ایکسچینج کے سیکورٹی گارڈز نے  دہشتگردوں کا بھرپور مقابلہ کیا۔

ڈی جی رینجرز نے مزید کہا کہ  حملے کے 10 منٹ میں پولیس اور رینجرز کی رپیڈ رسپانس فورس جائے حملہ پر پہنچ چکی تھیں۔

میجر جنرل عمر بخاری نے کہا کہ دہشت گرد پاکستان اسٹاک ایکسچینج پر حملہ کرنے کے بعد لوگوں کو یرغمال بنانا چاہتے تھے۔ دہشت گردوں کی گاڑی اور اسلحہ برآمد ہوا ہے ۔ دہشتگردوں کے پاس کھانے پینے کا سامان اور کافی مقدار میں اسلحہ موجود تھا۔