وزیرتوانائی عمر ایوب نے کہا ہے کہ وزیراعظم کے وژن کے مطابق ماحولیاتی آلودگی پر قابو پالیں گے، پاکستان توانائی کے شعبہ میں تیزی سے ترقی کر رہا ہے

تفصیلات کے مطابق اسلام آباد میں الیکٹرک چارجنگ سٹیشن کی افتتاحی تقریب سے خطاب کرتے ہوئے وزیرتوانائی عمر ایوب کا کہنا تھا کہ وزیر اعظم کے وژن کے مطابق ماحولیاتی آلودگی پر قابو پالیں گے، قابل تجدید توانائی کی پالیسی اور یورو 5 پیٹرول کی درآمد اسی سلسلے کی کڑی ایک کڑی ہے۔

انہوں نے کہا کہ پاکستان میں جدیدطریقوں پر فیول فراہمی کے اقدامات قابل ستائش ہیں، انشااللہ ہماری پالیسیاں توانائی کے شعبے میں وسعت و ترقی لائیں گی۔

وزیر توانائی کا کہنا ہے کہ سابق حکومت کی غلط پالیسیوں کی وجہ سے انرجی مکس کا سامنا ہے، ایسےاقدامات کر رہے ہیں کہ صارفین کو بہتر نرخوں پر بجلی میسر آئیگی۔

اس موقع پر معاون خصوصی ندیم بابر کا کہنا تھا کہ ہمیں آئندہ سالوں میں پاکستان کو ماحول پسند ایندھن کی طرف لے کر جانا ہے، وزیراعظم کے وژن کے مطابق پیٹرولیم ڈویژن کلین انرجی پر کام کر رہا ہے۔