سندھ حکومت نے سرکاری ملازمت اور پبلک سروس کمیشن امتحانات کے لئے عمر کی حد میں 15 سال کی رعایت دے دی۔

تفصیلات کے مطابق سندھ میں سرکاری ملازمتوں کے لیے درخواست دینے والے شہریوں کے لیے اچھی خبر سامنے  آگئی۔

وزیراعلیٰ سندھ نے سرکاری ملازمت کیلئے عمر میں 15 سال رعایت کی منظوری دے دی، رعایت کی منظوری کے بعد سندھ حکومت نے نوٹیفکیشن جاری کردیا گیا ہے۔

سندھ حکومت کی جانب سے جاری کردہ نوٹیفکیشن کےمطابق عمر میں 15 سال کی رعایت 2022 تک ہوگی ۔

سرکاری ملازمت کیلئے عمر کی حد میں رعایت کی مدت ختم

  یاد رہے اس سے قبل سندھ حکومت کی جانب سے دی جانے والی سال 2018 میں سرکاری ملازمت کیلئے عمر کی حد میں 15 سال کی رعایت  30 جون 2020کوختم ہوگئی تھی۔

سندھ حکومت کے نوٹیفکیشن کے مطابق عمر میں رعایت پولیس اور پبلک سروس کمیشن کے تحت کمیشن کے امتحان کی ملازمت کے لیے نہیں دی گئی تھی۔

نوٹیفکیشن کی مدت ختم ہونے کے حوالے سے ملازمت کے حصول میں سرگرم اور درخواست گزاروں نے سندھ حکومت اور وزیراعلیٰ سید مراد علی شاہ سے درخواست کی تھی کہ عمر کی حد میں رعایت کے نوٹیفکیشن کی مدت میں اضافہ کیا جائے۔

درخواست گزاروں نے کہا تھا کہ  کورونا وائرس کے باعث گزشتہ پانچ ماہ سے سرکاری ملازمت کے لیے جمع کرائے گئے فارم اور انٹرویوز اور نئی ملازمتوں کے اعلان میں تاخیر سے وہ رعایت سے مستفید نہیں ہوسکے۔