شاہ محمو دقریشی کا کہنا ہے کہ بھارت عالمی قوانین کی خلاف ورزیاں کر رہا ہے، بھارت اقوام متحدہ کے مبصرین کو محدود رکھتا ہے کہ سچ چھپا سکے۔

تفصیلات کے مطابق وزیر خارجہ شاہ محمود قریشی کا عالمی میڈیا کے ایل او سی کے دورے کے حوالے سے اپنے بیان میں کہا ہے کہ بھارت ایل او سی پر شہری آبادیوں کو نشانہ بنا رہا ہے، انڈیا کی طرف سے ہمیشہ دہرا معیار سامنے آیا۔

انھوں نے کہا کہ غیر ملکی میڈیا کے نمائندوں کا ایل او سی دورہ بہت اہم تھا، بھارت کی طرف سے ہمیشہ دہرا معیار سامنے آیا، پاکستان نے عالمی میڈیا کو بلایا اور کہا آکے دیکھیے، کیا بھارت آزاد اور غیرجانبدار صحافیوں کو مقبوضہ کشمیر لے جائے گا۔

وزیر خارجہ نے کہا بھارت عالمی قوانین کی خلاف ورزیاں کر رہا ہے، بھارت اقوام متحدہ کے مبصرین کو محدود رکھتا ہے کہ سچ چھپا سکے۔

شاہ محمود قریشی نے بنگلادیش کے تعلقات کے حوالے سے بتا یا کہ  بنگلادیش کیساتھ اچھے تعلقات کے خواہاں ہیں، بنگلادیش کیساتھ ماضی کی تلخیاں بھلا کر اچھا مستقبل چاہتے ہیں، ہم نے بنگلادیش میں نئے سفیر کی تعیناتی بھی کر دی۔

انہوں نے مزید کہا کہ بھارت کے پڑوسیوں سے تعلقات کشیدہ ہو رہے ہیں، بھارت  ہندتوا  سوچ کی وجہ سے دیگر ممالک کے ساتھ تعلقات خراب کر رہا ہے، ایران نے بھی بھارت کو چاہ بہار منصوبے سے باہر نکال دیا، مودی سرکار کی پالیسیوں کے باعث  شائننگ انڈیا  کے امیج کا بیڑا غرق ہو گیا ہے۔