پاکستان مسلم لیگ (ن) کی ترجمان مریم اورنگزیب نے معاون خصوصی احتساب مرزا شہزاد اکبر کو چینی ، پٹرول اور آٹا چور مافیا  کا جعلی ترجمان قرار دے دیا ہے۔

ترجمان مسلم لیگ ن نے کہا ہے کہ عمران صاحب نے ہی چینی برآمد کرنے، سبسڈی دینے، قیمتوں میں اضافہ کرنے کی ہدایت دی تھی اور اب چینی چور عمران مافیا نے ہی چینی چوروں کو بچانے کے لئے انکوائری کمشن بنانے کی ہدایت کی ہے۔

مریم اورنگزیب نے کہا کہ  عمران چینی چور مافیا نے ہی چینی چور جہانگیر ترین کو رات و رات پرائیویٹ جیٹ پر فرار کرانے کی ہدایت کی تھی۔

انہوں نے بتایا کہ چینی کمشن کی رپورٹ عمران خان نے نہیں بلکہ مسلم لیگ ن کے بنائے قانون کی وجہ سے سامنے لانی پڑی ہے اور اب حکومت کی چوری کی نیت، نااہلی، نالائقی اور بدانتظامی کی وجہ سے تاریخی آٹا بحران منڈلا رہا ہے۔

ترجمان نے مزید کہا کہ عمران صاحب کی چوری کی نیت، مس مینجمنٹ، نالائقی اور نااہلی سے ملک میں ہر بحران آیا ہے اس لئے عمران صاحب آئیں بائیں شائیں نہ کریں، قوم کو آٹا، گندم، چینی، پٹرول اور ڈالر چوری کا حساب دیں۔

انہوں نے کہا کہ 2018 میں ”اوپر“ سے آنے والی تبدیلی نے ملک وقوم کی بنیادیں ہلا دیں، اس کا خمیازہ قوم ہر روز بھگت رہی ہے کیونکہ اوپر سے آنے والی تبدیلی کی سزا قوم بے روزگاری، مہنگائی، آٹا، چینی اور پٹرول چوری کی صورت بھگت رہی ہے۔