وزیراعظم کے خصوصی مشیر برائے یوتھ افیئرز عثمان ڈار نے کہا ہے کہ نوجوانوں کی ترقی، خوشحالی اور خود مختاری حکومت کی اولین ترجیحات میں شامل ہے۔

عثمان ڈار نے بتایا ہے کہ کامیاب جوان پروگرام کے فیز ٹو میں تمام بینکس کو شامل کرلیا گیا ہے، پروگرام میں25ارب روپے نوجوان لڑکیوں کے لئے رکھے گئے ہیں کیونکہ نیشنل یوتھ ڈویلپمنٹ پروگرام کا مقصد نوجوانوں کی صلاحیتوں اور ہنرکو اجاگر کرکے آگے بڑھنے میں مدد فراہم کرنا ہے۔

عثمان ڈار کا کہنا تھا کہ حکومت نوجوان افرادی قوت کو اکنامک فورس بنانے کے لئے تمام وسائل بروئے کار لارہی ہے اسی سلسلے میں حکومت کی جانب سے کامیاب جوان پروگرام کے فیز ٹو میں تمام بینکس کو شامل کرلیا گیا ہے اورنوجوانوں کو بینکوں سے ملنے والے قرضے پر مارک اپ مزید کم کردیا ہے۔

خیال رہے کہ اس سے قبل وزیراعظم کے خصوصی مشیر برائے یوتھ افیئرز عثمان ڈار نے لاہور چیمبر آف کامرس کا دورہ کیا جہاں پر عثمان ڈار نے لاہور چیمبر کے صدر عرفان اقبال شیخ، سینئر نائب صدر علی حسام اصغر اور نائب صدر میاں زاہد جاوید احمد سے ملاقات کی۔

دورہ اور ملاقات کے بعد وزیراعظم کے خصوصی مشیر برائے یوتھ افیئرز عثمان ڈار نے پریس کانفرنس کی اور بتایا کہ کامیاب جوان پروگرام کے فیز ٹو میں تمام بینکس کو شامل کرلیا گیا ہے، پروگرام میں25ارب روپے نوجوان لڑکیوں کے لئے رکھے گئے ہیں۔

دوسری جانب صدر چیمبر آف کامرس نے کہا ہے کہ ملک میں نوجوانوں کی بڑی تعداد روز گار کی تلاش یا بہتر روزگار کے مواقعوں کے حصول کے لئے بیرون ملک چلی جاتی ہے اور گزشتہ ادوار میں روزگار کے لئے بیرون ملک جانے والے نوجوانوں کی تعداد میں اضافہ ہوا ہے۔

انہوں نے کہا کہ پاکستان جیسا ترقی پذیر ملک اتنی بڑی تعداد میں افرادی قوت کی کمی کا متحمل نہیں ہو سکتا لیکن کامیاب نوجوان پروگرام سے صنعتوں کے لئے موزوں افرادی قوت کی فراہمی میں مدد ملے گی۔