صوبائی وزیراطلاعات سید ناصر حسین شاہ نے کہا ہے کہ صوبے میں گندم اور آٹے کی قلت نہیں ہے۔

تفصیلات کے مطابق وزیراطلاعات سید ناصر حسین شاہ نے ترجمان سندھ حکومت مرتضی وہاب کے ہمراہ کراچی میں پریس کانفرنس کرتے ہوئے کہا کہ آٹے کے بحران کا ذمہ دار محکمہ خوراک سندھ نہیں ہے۔

ناصر حسین شاہ نے کہا کہ سندھ میں خوراک محکمے نے وفاقی حکومت کے محکمے پاسکو اور دیگر صوبوں سے 98فیصد گندم خریداری کی۔

وزیراطلاعات نے یہ بھی کہا کہ وزیراعلی سندھ کی صدارت اس متعلق اجلاس ہوا ہے، اجلاس میں آٹے اور گندم کی ذخیرہ اندوزی کے خلاف کریک ڈائون کا فیصلہ ہوا ہے۔

ناصر حسین شاہ کا کہنا تھا کہ سندھ حکومت نے وفاق سے گندم کی اسمگلنگ روکنے کے لیے اقدامات کرنے کا مطالبہ کرتے ہوئے کہا ہے کہ گندم بلوچستان یا خیبرپختونخوا سے اسمگل ہو رہی ہے وفاقی حکومت سے درخواست کرتا ہوں اسمگلنگ کو روکیں۔

آٹے کی قیمتیوں میں بتدریج اضافہ

وزیراطلاعات نے دعویٰ کیا کہ یہاں پر آٹا دیگر صوبوں سے سستا مل رہا ہے لیکن خیرہ اندوزی کی وجہ سے کراچی کے لوگوں کو آٹا مہنگا مل رہا ہے، جہاں جہاں ذخیرہ اندوزی کی گئی ہے ان پر جرمانے عائد کیے گئے ہیں جن لوگوں نےذخیرہ اندوزی کی ہےان کو وارننگ دے رہا ہوں۔

وزیراطلاعات سید ناصر حسین شاہ کا کہنا تھا کہ وفاقی حکومت اور پی ٹی آئی ایسا تاثر دینے کی کوشش کر رہے ہیں، جبکہ اگر وفاق کی پالیسی بہتر ہو تو ہم ضرور ان کے احکامات کے پابند ہوں گے ۔

وزیراطلاعات سید ناصر حسین شاہ کا مزید کہنا تھا کہ وزیراعلی نے آئی جی سندھ سمیت تمام ڈپٹی کمشنرز کو کریک ڈائون کا حکم دیا ہے، ذخیرہ اندوز سن لیں مکمل کریک کرینگے۔