پنجاب حکومت نے عید کے بعد ریسٹورنٹس اورشادی ہالز کھولنے کا فیصلہ کر لیا۔

تفصیلات کے مطابق پنجاب حکومت نے عید کے بعد ریسٹورنٹس اور ستمبر کے پہلے ہفتے شادی ہالز ایس او پیز کے ساتھ کھولنے کا فیصلہ کیا ہے۔

ذرائع کے مطابق وزیر صنعت پنجاب میاں اسلم اقبال کا اس سلسلے میں کہنا ہے کہ عید کے بعد ریسٹورنٹس کھولے جا رہے ہیں،عید تک ایس او پیز بنا کر وفاقی حکومت کو بھجوائی جائیں گی۔

انہوں نے کہا کہ عالمی وبا کورونا وائرس کے کیسز جیسے جیسے نیچے آئیں گے ویسے ویسے سیکٹرز کھولے جائیں گے۔

وزیر صنعت پنجاب نے کہا کہ شادی ہالز مالکان سے میٹنگ میں یکم ستمبر کو کھولنے پر اتفاق ہوا تھا، شادی ہالز ستمبر کے پہلے ہفتے میں ایس اوپیز کے ساتھ کھولنے کی اجازت دینگے، پنجاب حکومت تنہا نہیں وفاق اور دیگر صوبوں کو ساتھ ملا کر فیصلے کرتی ہے۔