وزیراعظم عمران خان نے کہا ہے کہ موجودہ دور میں انٹرنیٹ کی فراہمی ایک اہم ضرورت بن چکی ہے۔

تفصیلات کے مطابق وزیرِ اعظم عمران خان کی زیر صدارت ملک میں انٹرنیٹ کی کوریج کو بڑھانے اور بہتر بنانے کے حوالے سے اجلاس ہوا جس میں مختلف علاقوں میں انٹرنیٹ سروس کی فراہمی و بہتری کے لئے مختلف منصوبوں کی پیش رفت پر بریفنگ دی گئی۔

اجلاس میں لسبیلہ، آواران، کیچ، گوادر، خضدار، قلات، مستونگ، جعفرآباد، نصیر آباد، لہری، کچی، سبی، پشین، قلعہ سیف اللہ، زوہب، لورالائی، موسیٰ خیل اور  برکھان  کے اضلاع، صوبہ سندھ میں گھوٹکی، قمبر، شہدادکوٹ، نوشہرو فیروز، شکارپور چترال، سوابی، بنوں، ساہیوال، ملتان، چکوال اور اٹک میں انٹرنیٹ کی صورتحال پر بریفنگ دی گئی جبکہ انضمام شدہ علاقوں میں انٹرنیٹ کی سہولت کی فراہمی کے حوالے سے پیش رفت پر بھی تفصیلی بات چیت کی گئی۔

 اس موقع پر وزیرِ اعظم کو ملک بھر میں خصوصاً دور دراز اور پس ماندہ علاقوں میں انٹر نیٹ کی کوریج اور انٹرنیٹ بہتر سروس کی فراہمی کے حوالے سے  گذشتہ دو سال کے منصوبوں اور رواں سال کے اہداف کے بارے میں تفصیلی بریفنگ دی گئی۔

وزیراعظم کو بریفنگ میں بتایا گیا کہ یو ایس ایف کی جانب سے انٹرنیٹ کی سروسز کی بہتر فراہمی کو یقینی بنانے کے لئے فائبر آپٹک بچھانے پر خصوصی توجہ دی جا رہی ہے جبکہ گذشتہ دو سالوں میں اٹھارہ سو کلومیٹر  طویل فائبر آپٹک بلوچستان اور خیبر پختونخواہ کے مختلف علاقوں میں بچھائی گئی اور اس سال 547 یونین کونسلوں میں 4600کلومیٹر فائبر آپٹک بچھائی جائے گی۔

 وزیراعظم نے کہا کہ ملک کی نوجوان نسل کی تعلیم تک آسان رسائی کو یقینی بنایا جائے جبکہ اسکولوں میں بھی انٹرنیٹ کی سستی فراہمی کے حوالے سے ضروری اقدامات کیے جائیں۔

عمران خان نے یہ بھی کہا کہ دور دراز اور پس ماندہ علاقوں میں انٹرنیٹ کی سہولت کی  فراہمی اور بہتر کوریج کو یقینی بنانے پر خصوصی توجہ دی جائے۔

پاکستان میں انٹرنیٹ صارفین کیلئے نئی پابندی

وزیراعظم عمران خان نے اجلاس میں ہدایت دی کہ انٹرنیٹ کی وسیع کوریج اور آسان  دستیابی نہایت ضروری ہے، یو ایس ایف اس حوالے سے بھی موثر کردار ادا کرے۔

اجلاس میں امین الحق، شفقت محمود، سیکرٹری آئی ٹی، چئیرمین پی ٹی اے , سی ای او یونیورسل سروس فنڈ و دیگر افسران شریک ہوئے۔