مسلم لیگ ن کے مرکزی رہنما خواجہ آصف آج نیب کے سامنے پیش ہوں گے۔

تفصیلات کے مطابق خواجہ آصف کو مطلوبہ دستاویزات سمیت 11 بجے نیب میں پیش ہونے کی ہدایت کی گئی ہے۔

ذرائع کے مطابق خواجہ آصف کو اس سے قبل 26 جون کو نیب نے طلب کیا لیکن انہوں نے قومی احتساب بیورو کے روبرو پیش نہ ہونے کا فیصلہ کیا تھا۔

خواجہ آصف کے وکیل چودھری نجم الحسن نے نیب لاہورمیں جواب جمع کروایا تھا جس میں کہا گیا کہ خواجہ آصف اسمبلی کے بجٹ اجلاس کے باعث نیب میں پیش نہیں ہوں گے۔

جواب میں یہ بھی کہا گیا تھا کہ آئندہ جو بھی تاریخ دی جائے گی وہ پیش ہوں گے۔

واضح رہےکہ ان پر نیب کی جانب سے الزام عائد کیا گیا ہے کہ انہوں  نے سوسائٹی انتظامیہ کی ملی بھگت سے 137 کنال اراضی غیر قانونی فروخت کی۔

خواجہ آصف پر یہ الزام بھی عائد کیا گیا ہے کہ انہوں نے ان شہریوں کی اراضی پر قبضہ کیا جنہوں نے کبھی زمین فروخت ہی نہیں کی۔

نیب  کی جانب سے کہا گیا ہے کہ سوسائٹی نے غیر قانونی طور پر اراضی پر قبضے کیے۔

اس کیس میں خواجہ آصف کے اہل خانہ بھی شامل ہیں۔