سعید غنی نے کہا ہے کہ گذشتہ دو سال اس ملک کی تاریخ کے سیاہ ترین دو سال ہیں، جس میں عمران نیازی نے اس ملک کے عوام سے جو وعدے اور دعوے کئے ان سب سے یو ٹرن لیا ہے اور ان دو سالوں کے درمیان معیشت کا جو جنازہ نکلا ہے ایسا 70 سال کی ملکی تاریخ میں نہیں نکلا ہے۔

تفصیلات کے مطابق حکومت کے دو سال مکمل ہونے پر وزیر تعلیم و محنت سندھ سعید غنی نے ویڈیو پیغام جاری کیا ہے۔

صوبائی وزیر برائے تعلیم سعید غنی نے کہا ہے کہ 25 جولائی کی تاریخ کو اس ملک کا کوئی شخص نہیں بھول سکتا ہے کیونکہ اسی تاریخ کو ایک نااہل، نالائق اور سلیکٹیڈ حکومت اس ملک کے عوام پر مسلط کردی گئی تھی.

انہوں نے کہا ہے کہ اس نااہل اور نالائق حکومت نے دو سال کے دوران جتنے قرضے لیے ماضی کی حکومتوں نے 5 سال یا 10 سال میں بھی نہیں لئے ہیں۔

انہوں نے کہا ہے کہ چینی اسکینڈل کے نام پر اس ملک کے عوام پر 300 ارب روپے لوٹ لئے گئے اور یہ سب پی ٹی آئی کے اے ٹی ایم ہیں، جن میں سے کچھ ملک سے باہر چلیں گئے ہیں اور جو ملک میں ہیں وہ عدالتوں میں گئے ہیں۔

سعید غنی نے کہا ہے کہ پی ٹی آئی کی بدانتظامی کے باعث ملک میں گندم کا بحران پیدا ہوا ہے اور اس کی قیمتیں بڑھ رہی ہیں جبکہ پیٹرولیم مصنوعات کی قیمتوں میں 27 سے 65 فیصد اضافہ، ادویات، گیس، بجلی، سمیت تمام اشیاء کی قیمتوں میں ہوش ربا اضافہ موجودہ نالائق اور نااہل حکومت کا اس عوام کو تحفہ بھی انہی دو سال میں ملا ہے۔

صوبائی وزیر کا کہنا تھا کہ موجودہ سلیکٹیڈ حکومت کے دو سالوں کے دوران لاکھوں افراد بے روزگار اور کروڑوں افراد غربت کی لکیر سے نیچے چلے گئے ہیں اور اگر یہ کہا جائے تو بے جا نہ ہوگا کہ گذشتہ دو برس ملک کی بربادی کے، اس ملک کے عوام کی زندگی کو اجیرن بنانے، اپوزیشن کے خلاف انتقامی کارروائیوں اور عدلیہ و میڈیا پر قدغن کے تھے بے جا نہ ہوگا۔

انہوں نے واضح کیا ہے کہ ہم دعا گو ہیں کہ اللہ تعالیٰ جلد ان نالائق اور نااہل حکمرانوں سے ہماری جان چھڑائے اور اس ملک کو ترقی کی جانب گامزن کرے۔