صوبائی وزیر سندھ برائے تعلیم سعید غنی نے آج پریس کانفرنس کے دوران وفاق پر کڑی تنقید کرتے ہوئے کہا ہے کہ وفاق، سندھ اور کراچی کے لوگوں کے ساتھ جو زیادتی کررہی ہے۔

انہوں نے کہا ہے کہ کورونا کے اس ماحول میں ایک مریض کیسے کمرے بند رہ سکتا ہے لیکن لوڈ شیڈنگ کی جارہی ہے جو مریض کو گھروں سے نکلنے پر مجبور کر رہی ہے۔

سعید غنی نے کہا کہ کراچی میں بجلی پیدا کرنے والے ادارے کو ہی بجلی مہنگی کردی گئی ہے۔

انہوں نے اپنی پریس کانفرنس میں عمران خان پر تنقید کرتے ہوئے کہا ہے کہ صرف یہ بتادیں کہ عمران خان کا ذریعہ معاش کیا ہے، ہم اور کچھ نہیں پوچھ رہے ہیں۔

ان کا مزید کہنا تھا کہ وفاقی کی جانب سے الزام عائد کیا گیا ہے کہ بلاول بھٹو نے 4 لاکھ ٹیکس جمع کرائے ہیں، اگر اس سے متعلق کوئی ثبوت موجود ہے تو سامنے لے کر آئیں۔

صوبائی وزیر سعید غنی نے کہا ہے کہ ریحام خان نے اپنی کتاب میں لکھا ہے کہ عارف نقوی نے عمران خان کے الیکشن کا خرچہ اٹھایا ہے اور جب برطانیہ میں اس کو پکڑا تو اس نے عمران خان کا نام اور نمبر لکھا اور کہا کہ یہ میرا ریفرنس ہے۔

انہوں نے واضح کیا کہ جعلی اکاؤنٹ کے کیس میں سوکالڈ پیسوں کو بنیاد بنا کر فریال تالپور اور آصف علی زرداری کو گرفتار کیا جبکہ شوگر کمیشن کہتا ہے جہانگیر ترین نے ناجائز پیسہ بنایا تو وہ اب تک گرفتار کیوں نہیں ہوا ہے۔