وفاقی وزیر اطلاعات شبلی فراز کا کہنا ہے کہ اپوزیشن کی اٹھک بیٹھک سے پی ٹی آئی حکومت کو کوئی فرق نہیں پڑنے والا ہے۔

تفصیلات کے مطابق پی ٹی آئی سنٹرل پنجا ب کے صدر اعجازاحمد چوہدری نے  وفاقی وزیر اطلاعات شبلی فراز سے ملاقات کی ۔

ملاقات میں  ملکی سیاسی صورتحال سمیت دیگر اہم امور پر تبادلہ خیال کیا گیا۔

وفاقی وزیر اطلاعات شبلی فراز نے کہا کہ   وزیراعظم عمران خان کے ویژن کو ہر حال میں پورا کریں گے، عوام کی فلاح و ترقی ہی پی ٹی آئی کا منشور ہے۔

وفاقی وزیر اطلاعات نے کہا کہ مسلم لیگ ن اور پیپلز پارٹی کی غلطیوں کا ازالہ اوربغیر کسی نمود و نمائش کے دن رات کام کررہے ہیں۔

شبلی فراز نے کہا کہ پیپلزپارٹی اور ن لیگ کی قیادت نے ہمیشہ لوٹ مارکو اپنایا اور ملک کو نقصان پہنچایا ہے۔ قوم ملک کا خون چوسنے والوں کے شور شرابے پرپر کان نہیں دھرےگی۔کرپٹ اپوزیشن کی چیخ وپکار صرف لوٹے ہوئے مال کو بچانے کے لیے ہے۔

اس موقع پر اعجاز چوہدری نے کہا کہ شہباز شریف کی کرتوتوں کا پردہ چاک ہو چکا ہے۔منظور پاپڑ والے کے اکاوئنٹ کو شہباز شریف نے اپنی دونمبری کے لیے استعمال کیا۔

انہوں نے مزید کہا کہ شہباز شریف قوم کو جواب دیں اور اپنے وعدے کے مطابق سیاست چھوڑ دیں۔ٹی ٹی شریف کی دھیلے کی نہیں بلکہ اربوں ڈالر کی کرپشن پکڑی جاچکی ہے۔