وزیراعظم عمران خان  کا کہنا ہے کہ بیرون ملک مقیم پاکستانی ملک و قوم کا سب سے قیمتی اثاثہ ہیں۔

تفصیلات کے مطابق  وزیراعظم عمران خان کی زیر صدارت ملکی معیشت سے متعلق اجلاس ہوا۔

اجلاس میں مشیر خزانہ ڈاکٹر عبدالحفیط شیخ، معاون خصوصی برائے احتساب شہزاد اکبر، ڈاکٹر عشرت حسین ،گورنر اسٹیٹ بینک ڈاکٹر رضا باقر، سیکرٹری خزانہ ، چیئرمین ایف بی آر اور  دیگر افسران شریک ہوئے۔

اجلاس میں ترسیلات زر اور ملکی زرمبادلہ کے ذخائر کی صورتحال اور ان میں مزید اضافے کے لیے مجوزہ تجاویز و اقدامات پر غور کیا گیا۔

وزیراعظم نے جولائی 2020میں  بیرون ملک پاکستانیوں کی جانب سے بھیجی جانے والی ترسیلات زر میں  واضح اضافے پر اطمینان کا اظہار کیا۔

اس موقع پر وزیر اعظم نے کہا کہ   بیرون ملک مقیم پاکستانی ملک و قوم کا سب سے قیمتی اثاثہ ہیں۔ ترسیلات زر کے حوالے سے بیرون ملک پاکستانیوں کو ہر ممکنہ سہولت فراہم کرنا حکومت کی اولین ترجیح ہے۔

عمران خان نے ہدایت کی  ترسیلات زر اور ملکی زر مبادلہ میں اضافے کے لئے مزید اقدامات تجویز کیے جائیں جس سے  اندرون و بیرون ملک مقیم پاکستانیوں کی حوصلہ افزائی ہو اور   پاکستانی ملکی معیشت کے استحکام میں بڑھ چڑھ کر حصہ لے سکیں ۔