وزیراعظم  عمران خان کا کہنا ہے کہ ایم ایل ون منصوبے سے ریلوے کا نظام جدید اور مضبوط ہوگا۔

تفصیلات کے مطابق وزیراعظم عمران خان کی زیرصدارت ایم ایل ون  منصوبے کے حوالے سے اجلاس ہوا۔

اجلاس میں  شیخ رشید احمد، اسد عمر اور  ڈاکٹر عبدالحفیظ شیخ ،چیئرمین سی پیک اتھارٹی عاصم سلیم باجوہ اور دیگر سینئرافسران  شریک ہوئے۔

وزیر اعظم کو ایم ایل ون منصوبے، منصوبے پر عمل درآمد کے حوالے سے مقرر کردہ ٹائم لائنز اور اب تک ہونے والی پیش رفت اور منصوبے کے ثمرات پر تفصیلی بریفنگ دی گئی۔

اس موقع پر وزیر اعظم نے کہا کہ ایم ایل ون منصوبہ سی پیک کا سب سے اہم اور کلیدی منصوبہ ہے، ایم ایل ون منصوبے سے ریلوے کا نظام جدید اور مضبوط ہوگا۔

عمران خان نے کہا کہ اس  منصوبے پر عمل درآمد سے ہنرمندوں اور تربیت یافتہ افراد کے لیے نوکریوں کے ہزاروں مواقع پیدا ہوں گے اور صنعتی عمل کو فروغ ملے گا۔

انہوں نے مزید کہا کہ   ایم ایل ون منصوبے سے عوام کو سفر اور مال برداری کی بہتر سہولیات میسر آئیں گی۔ایم ایل ون منصوبے سے کاروباری برادری کے لیے جہاں کاروبار میں آسانیاں پیدا ہوں گی وہاں کاروباری لاگت میں واضح کمی واقع ہوگی۔

وزیر اعظم نے کہا کہ ایم ایل ون منصوبے سے سماجی و معاشی ترقی کا نیا باب روشن ہوگا۔ترقیاتی منصوبوں کی ترجیحات کے تعین میں ہمارے پیش نظر عوام کی فلاح و بہبود اور ملک کی ترقی ہے۔