وزیراعظم عمران خان کا کہنا ہے کہ  ملک کی ترقی سائنس اور ٹیکنالوجی کے فروغ سے وابستہ ہے۔

تفصیلات کے مطابق  وزیراعظم عمران خان کی زیر صدارت وزارت سائنس اور ٹیکنالوجی کے نئے منصوبوں سے متعلق اجلاس ہوا۔

اجلاس میں وزیر سائنس اور ٹیکنالوجی فواد چودھری، عبدالرزاق داؤد، سیکرٹری خزانہ، چیئرمین ایف بی آر اور دیگر سینئر افسران شریک ہوئے۔

فواد چودھری  نے وزیراعظم کوملک میں سائنس اور ٹیکنالوجی کے فروغ کے حوالے سے منصوبوں ، کامیابیوں کے بارے میں بریفنگ دی۔

وزیر اعظم ہاؤس میں انجنیئرنگ اور ایمرجنگ ٹیکنالوجی کے حوالے سے مجوزہ یونیورسٹی کے قیام کے منصوبے پر پیش رفت پر  بھی بریفنگ دی گئی۔

وزیر اعظم کو ملک بھر میں صاف پانی کی فراہمی کے پلانٹس پر  بھی بریفنگ دی گئی۔منصوبے کے ذریعے نوجوانوں اور خواتین کو روزگار کی فراہمی کے حوالے سے مجوزہ منصوبے پر  بھی بریفنگ دی گئی۔

اجلاس میں ملک بھر کے چار سو ہائر سیکنڈری اسکولوں میں سائنس، ٹیکنالوجی ، انجنیرنگ اور ریاضی کی تعلیم کے حوالے سے  اسٹیم منصوبہ شروع کرنے کی منظوری دی گئی۔

چالیس اسکولوں میں  سائنس ، ٹیکنالوجی ، انجنیرنگ اور ریاضی کی جدید تعلیم کے لیے خصوصی لیب  بھی قائم کی جائیں گی۔

چار سو اسکولوں میں ایک لاکھ بچوں کو جدید علوم میں تعلیم و تربیت کے مواقع میسر آئیں گے۔

طبی آلات  کی تیاری میں ملکی استعداد اور برآمدات میں اضافے کے حوالے سے مجوزہ روڈ میپ پر بھی وزیراعظم کو بریفنگ دی گئی جبکہ  زراعت کے شعبے کو جدید بنیادوں پر استوار کرنے اور زرعی پیداوار کو بڑھانے کا پلان وزیراعظم کو پیش کیا گیا۔

جدید ٹیکنالوجی کو بروئے کار لاکر ملکی استعداد کو بروئے کار لانے کے حوالے سے پلان بھی وزیراعظم کو پیش کیا گیا۔

وزیراعظم نے کورونا کے دوران  مقامی سطح پر حفاظتی کٹس، وینٹیلیٹرز و دیگر سامان کی تیاری پر وزارت سائنس اور ٹیکنالوجی خصوصاً وزیرسائنس کی کاوشوں کو سراہا۔

وزیراعظم نے زراعت ، ملکی برآمدات  میں اضافے اور سائنس اور ٹیکنالوجی کے فروغ کے حوالے سے مجوزہ منصوبوں کو بھی سراہا۔

اس موقع پر وزیر اعظم نے کہا کہ  ملک کی نوجوان نسل میں بے انتہا صلاحیت موجود ہے۔ ملک کی ترقی سائنس اور ٹیکنالوجی کے فروغ سے وابستہ ہے۔

عمران خان نے کہا کہ  ان منصوبوں کو جلد از جلد حتمی شکل دی جائے تاکہ ان پر عمل درآمد شروع کیا جا سکے۔