وزیراعظم عمران خان کا کہنا ہے کہ ایف اے ٹی ایف قوانین ہر صورت پاس کروائیں گے۔

تفصیلات کے مطابق مشیر پارلیمانی امور ڈاکٹر بابر اعوان نے وزیراعظم عمران خان سے ملاقات کی۔

ملاقات میں اہم آئینی، قانونی اور ملکی امور  سمیت ایف اے ٹی ایف سے متعلق قانون سازی اور پارلیمانی معاملات پر تفصیلی مشاورت کی گئی ۔

بابر اعوان  نے وزیراعظم کو ایف اے ٹی ایف قانون سازی سے متعلق بریفنگ دی۔

وزیراعظم نے پیر سے قومی اسمبلی اور سینیٹ کا اجلاس منعقد کرنے کی ہدایت کر تے ہوئے کہا کہ  ایف اے ٹی ایف قوانین ہر صورت پاس کروائیں گے۔ایف اے ٹی ایف قانون کی مخالفت قومی اہداف کی مخالفت ہے۔

عمران خان نے کہا کہ  ملکی سلامتی اور عوامی مفاد کی قانون سازی میں تاخیر نہیں ہونی چاہئیے۔عام آدمی کو ریلیف فراہم کرنے کے ہر ممکن اقدامات کیے جا رہے ہیں۔

انہوں نے کہا کہ حکومت نے مکمل توجہ معاشی اور سماجی حالات کی بہتری پر مرکوز کر رکھی ہے۔

بابر اعوان  نے وزیراعظم کو مختلف وزارتوں کے زیر التواء بلز پر بھی بریفنگ دی جس پر  وزیراعظم نے زیر التواء بلز فوری پارلیمنٹری افیئر زبھیجنے کی ہدایت کر دی۔

اس موقع پر بابر اعوان نے کہا کہ  عوامی ریلیف کے لیے کیے گئے حالیہ حکومتی اقدامات کے مثبت نتائج مل رہے ہیں۔ مشکل حالات میں حکومتی تعاون عوام کے لیے اطمینان کا باعث بنے گا۔