وزیراعظم عمران خان نے کہا ہے کہ سبسڈیز کا مقصد معاشرے کے کمزور طبقوں کی معاونت  اور سماجی و معاشی ترقی کا فروغ ہے۔

تفصیلات کے مطابق وزیراعظم عمران خان کی زیر صدارت اجلاس منعقد ہوا جس میں سبسڈی کے نظام کو شفاف اور منظم بنانے اور اس معاونت کو حقدار تک پہنچانے کو یقینی بنانے کا جائزہ لیا گیا ہے۔

اجلاس میں وزیراعظم کا کہنا تھا کہ سبسڈی کے معاملے میں حکومت کی ترجیحات نہایت واضح ہیں کیونکہ اس نظام میں اصلاحات حکومت کی اولین ترجیح ہے۔

وزیراعظم نے کہا ہے کہ غیر مستحق افراد کا سبسڈیز کے نظام سے  فائدہ اٹھانا سرکاری وسائل کا ضیاع ہے کیونکہ یہ عمل حقداروں کی حق تلفی کا باعث بنتا ہے۔

اس ضمن میں وزیراعظم کا کہنا تھا کہ حکومتی ترجیحات کو مد نظر رکھتے ہوئے سبسڈی کے حوالے سے ہر قابل عمل تجویز کے حوالے سے روڈ میپ مرتب کیا جائے اور مرحلہ وار ان پر عمل درآمد کیا جائے۔

یاد رہے کہ اجلاس میں مختلف شعبوں میں  بالواسطہ اور بلاواسطہ فراہم کی جانے والی سبسڈیز کی مقدار اور نظام میں اصلاحات کے حوالے سے مختلف تجاویز پر بھی غور کیا گیا ہے۔

اجلاس میں محمد حماد اظہر، عبدالحفیظ شیخ، عبدالرزاق داؤد، ڈاکٹر ثانیہ نشتر،  ڈاکٹر شہباز گل، سابق سیکرٹری خزانہ ڈاکٹر وقار مسعود و دیگر سینئر افسران شریک ہوئے۔

 سابق وزیرِ خزانہ شوکت  ترین، سلطان علی الانہ، عارف حبیب، ڈاکٹر اعجاز نبی ویڈیو لنک کے ذریعے اجلاس میں شریک ہوئے۔