معاون خصوصی برائے سیاسی روابط ڈاکٹر شہباز گِل نے کہا ہے کہ عوام کے نام پر لوٹ مار کرنے والے مفرور اشتہاری عدالتوں کا سامنا کرنے سے کترا رہے ہیں۔

تفصیلات کے مطابق معاون خصوصی برائے سیاسی روابط ڈاکٹر شہباز گِل کا مریم اورنگزیب کے بیان پر ردعمل جاری کرتے ہوئے کہا ہے کہ آپکے لیڈرز نے عوام کے اربوں روپے بچائے نہیں لانڈر کرکے باہر پہنچائے ہیں اور اسی منی لانڈرنگ کی بدولت آج احتساب کے کٹہرے میں کھڑے ہیں۔

شہباز گل نے کہا ہے کہ ن لیگ نے پارٹی اکاؤنٹس کو بھی منی لانڈرنگ کیلئے استعمال کیا ہے اور بزنس مائنڈڈ جعلی جمہوریت پسندوں نے ملک کے ساتھ ساتھ پاڑی کو بھی “فیملی” لمیٹڈ کمپی کے طور پر رجسٹر کرایا اور چلایا ہے۔

ان کا کہنا تھا کہ تحریک انصاف نے الیکشن کمیشن میں 40 ہزار ڈونرزکا ریکارڈ جمع کرایا ہے اور مسلم لیگ ن سے 400 لوگوں کا ریکارڈ نہیں دیا جارہا ہے۔

انہوں نے واضح کیا ہے کہ رائیونڈ سے چھوٹے میاں کی نگرانی میں مافیاز کام کرتے تھے اور بڑے میاں نے پارٹی فنڈ میں 10 کروڑ دے کر اگلے روز 4 کروڑ اپنے اکاؤنٹ میں منتقل کیے تھے۔

معاون خصوصی کا مزید کہنا تھا کہ یہ حیران کن بات ہے کہ 5 میٹروز میں مال بنانے والا احتساب کا سامنا کرنے سے خائف ہے۔