وزیراعظم عمران خان نے کہا ہے کہ ایس ایم ایز ملکی معیشت کے استحکام و فروغ میں کلیدی کردارادا کرتی ہیں۔

تفصیلات کے مطابق وزیراعظم عمران خان کی زیر صدارت نیشنل کوارڈینیشن کمیٹی برائے سمال اینڈ میڈیئم انٹرپرائزز کا اجلاس ہوا جس میں چھوٹی اور درمیانے درجے کی صنعتوں کے حوالے سے مجوزہ ایس ایم ای پالیسی 2020 وزیراعظم کو پیش کی گئی۔

وزیرِاعظم کو مجوزہ پالیسی کے خدوخال پر تفصیلی بریفنگ دی گئی جبکہ ایس ایم ای شعبے کے فروغ اور معیشت میں ایس ایم ایز کے کردار کو مزید مستحکم کرنے کے حوالے سے  مختلف اقدامات کی نشاندہی کروائی گئی۔

وزیرِاعظم نے اجلاس میں وزارتِ صنعت و پیداوار کو آئندہ دو ہفتوں میں قابل عمل روڈ میپ کی تیاری  کی ذمہ داری سونپی ہے۔

اجلاس کی صدارت کرتے ہوئے وزیراعظم عمران خان نے کہا کہ چھوٹے اور درمیانے درجے کی صنعتوں کو ماضی میں نظر انداز کیا جاتا رہا جبکہ مالی مسائل کے حل سے لیکر ان کی مصنوعات و پیداوار کو بہتر بنانے کے امر کو یکسر نظر انداز کیا جاتا رہا ہے۔

وزیراعظم نے کہا کہ موجودہ حکومت تعمیرات اور ایس ایم ایز کے فروغ پر خصوصی توجہ دے رہی ہے جبکہ ایس ایم ایز ملکی معیشت کے فروغ میں کلیدی کردار ادا کرتی ہیں۔

عمران خان نے یہ بھی کہا کہ ایس ایم ایز کو سہولیات اور مراعات کی فراہمی کے حوالے سے بین الاقوامی  بہترین طریقہ کار سے استفادہ کیا جائے۔

وزیراعظم عمران خان نے مزید کہا کہ ایس ایم ایز کے فروغ کے لئے تمام رکاوٹیں دور کی جائیں گی جبکہ تمام ممکنہ مراعات فراہم کی جائیں گی۔

اجلاس میں محمد حماد اظہر، شبلی فراز، ڈاکٹرعبدالحفیظ شیخ،  گورنر سٹیٹ بنک ، چیئرمین ایف بی آر، متعلقہ وزارتوں کے سیکرٹریز دیگر سینئر افسران شریک ہوئے۔