وزیراعظم عمران خان نے کہا ہے کہ یہ اس وقت کی ضرورت ہے کہ اقوام عالم آگے بڑھیں اور ملکر ماحولیاتی تغیر کا مقابلہ کریں۔

تفصیلات کے مطابق وزیراعظم عمران خان کی جانب سے آسٹرین ورلڈ سمٹ سے خطاب میں ان کا کہنا تھا کہ محولیاتی تغیر کے پیش نظر جب ہمیں اقتدار حاصل ہوا تو ہماری حکومت نے 10 ارب درخت لگانے کا فیصلہ کیا تھا جس پر ہم آج بھی گامزن ہیں۔

انہوں نے بتایا کہ  سات سال قبل جب ہمیں خیبر پختونخوا کی حکومت ملی تو ہم نے 1 ارب درخت لگانے کا عزم کیا تھا جس کو ہم نے پورا بھی کیا گیا تھا۔

وزیراعظم کا کہنا تھا کہ آج سے 20 ِبرس قبل ماحولیاتی تغیر کی بات کرنے والوں کو تضحیک و مذاق کا نشانہ بنایا جاتا جبکہ یہ آج کے وقت کی سب سے بڑی اور تلخ حقیقت ہے۔

وزیراعظم کا کہنا تھا کہ آج پوری دنیا کو ماحولیاتی تغیرات اور اس سے وابستہ چیلنج دکھائی دے رہا ہے کیونکہ ہر روز دنیا کا درجہ حرارت بڑھ رہا ہے اور قطبین سے برف پگھل رہی ہے۔

عمران خان نے اپنے خطاب میں بتایا کہ یورپ میں بڑھتے ہوئے درجہ حرارت کے اثرات نمایاں ہیں جبکہ آسٹریلیا میں جنگلات بھی آگ کی لپیٹ میں ہیں اور آج بھی اگر دنیا اس کا نوٹس نہیں لیتی تو آئندہ نسلیں شدید خطرے سے دوچار رہیں گی۔