سابق وزیراعظم نواز شریف کو وطن واپس لانے کیلئے  وفاقی حکومت متحرک ہوگئی ہے جس کے لئے مشیر داخلہ  بیرسٹر شہزاد اکبر نے  برطانوی وزیر داخلہ کو خط بھی لکھ دیا ہے۔

ایک رپورٹ کے مطابق وزیراعظم عمران خان کے مشیر برائے احتساب و داخلہ  شہزاد اکبر نے 5 اکتوبر کو برطانوی وزیر داخلہ پریتی پٹیل کوخط لکھا تھا۔

خط میں کہا گیا ہے کہ نواز شریف ملک میں کرپشن کے ذمہ دار ہیں، امید ہے برطانوی وزیر داخلہ کرپشن کے ذمہ داروں کی ملک واپسی کیلئے پاکستانی حکومت کی کوششوں میں تعاون کریں گی۔

خط میں برطانوی وزیر داخلہ سے نواز شریف کو واپس بھیجنے کیلئے اپنے وسیع اختیارات کا استعمال کرنے پر زور دیا گیا ہے۔

شہزاد اکبر کی جانب سے لکھے گئے خط میں پاکستانی عدالت کے نواز شریف کی گرفتاری کے وارنٹ کا بھی حوالہ دیا گیا ہے۔

علاوہ ازیں اسلام آباد ہائیکورٹ نے سابق وزیراعظم کے ناقابل ضمانت وارنٹ گرفتاری جاری کردیے ہیں اور اشتہاری قرار دینے کیلئے کارروائی بھی شروع  کردی ہے۔

یاد رہےکہ سابق وزیراعظم نواز شریف گزشتہ سال نومبر سے لندن میں مقیم ہیں جہاں ان کا علاج جاری ہے۔