سندھ بھر میں 15 اکتوبر سے سی این جی اسٹیشنز غیر معینہ مدت تک بند رکھنے کا فیصلہ کرلیا گیا۔

تفصیلات کے مطابق سندھ بھر میں 15 اکتوبر سے تمام سی این جی پمپس کو گیس کی فراہمی بند کرنے کا منصوبہ تیار کرلیا گیا۔

ذرائع کا کہنا ہے کہ سندھ بھر میں صرف آر ایل این جی پر چلنے والے گیس اسٹیشنز کھلے رہیں گے۔

 سوئی سدرن گیس کمپنی (ایس ایس جی سی) کی ہدایت پر مالکان کو ہدایت کی گئی ہے کہ وہ سی این جی اسٹیشنز آر ایل این جی پر شفٹ کردیں۔

ذرائع کے مطابق 15 اکتوبر سے سی این جی اسٹیشنز یا تو بند ہوجائیں گے یا آر ایل این جی پر منتقل ہوں گے۔

واضح رہےکہ ایس ایس جی سی انتظامیہ کا کہنا تھا کہ سردیوں میں گیس کی کمی 250 سے 300 ایم ایم سی ایف ڈی تک پہنچنے کا امکان ہے ، جس سے گھریلو صارفین کو گیس پہنچانا بہت مشکل ہوجائے گا۔