اسپیکر قومی اسمبلی اسد قیصر نے کہا ہے کہ پاک افغان تجارت و سرمایہ کاری کے ذریعے ملک اور عوام کی معاشی ترقی یقینی بنائیں گے۔

تفصیلات کے مطابق پاک افغان تجارت و سرمایہ کاری فورم 2020 کے دو روزہ  سیمنیار اختتامی سیشن سے  اسپیکر قومی اسمبلی اسد قیصر نے خطاب کرتے ہوئے کہا کہ سیمینار سے نہایت ہی معلوماتی اور امید افزاں تجاویز سامنے آئی ہیں۔

اسپیکر قومی اسمبلی نے کہا کہ دو روزہ سیمینار دونوں ممالک کے مابین تجارت و سرمایہ کاری کی راہ میں حائل رکاوٹوں کو دور کرنے میں موثر ثابت ہوگا۔

اسد قیصر نے یہ بھی کہا کہ ضمنی اجلاسوں کو زیادہ وقت دیا گیا تاکہ دونوں ممالک کے تاجر و سرمایہ کار اور کاروباری حضرات تمام مسائل سے آگاہ کریں جبکہ ضمنی اجلاسوں میں دی گئی تجاویز پر دونوں ممالک عمل درآمد یقینی بنائیں گے۔

اسپیکر قومی اسمبلی کا کہنا تھا کہ مسائل دور ہونے سے تجارت و سرمایہ کاری میں کئی گنا اضافہ متوقع ہے جبکہ پاکستان کے ذریعے ٹرانزٹ ٹریڈ کو ممکنہ حد تک موثر اور باسہولت بنانا پاکستان کا وژن ہے۔

اسد قیصر کا یہ بھی کہنا تھا کہ سیمینار میں دی گئی ٹھوس سفارشات پر عمل درآمد یقینی بنا کر دونوں ممالک بہتر مستقبل کی جانب گامزن ہو سکتے ہیں جبکہ دونوں ممالک تجارت و سرمایہ کاری کے ذریعے ملک اور عوام کی معاشی ترقی یقینی بنائیں گے۔

اسپیکر قومی اسمبلی اسد قیصر کا مزید کہنا تھا کہ افغانستان سے سیمینار میں شرکت کرنے والے افغان پارلیمنٹیریین، سرمایہ کاروں ، تاجروں اور بزنس کمیونٹی کا تہ دل سے شکر گزار ہوں، باہمی تعاون کے فروغ دونوں ممالک کے مابین درآمدات اور برآمدات میں نمایاں بہتری آئے گی۔