عالمی وبا کے بڑھتے وار کے پیش نظر پاکستان بھر میں مارکیٹیں رات 10 بجے بند کرنے کا فیصلہ کیا گیا ہے۔

تفصیلات کے مطابق کورونا وائرس کے بڑھتے کیسز کی روک تھام کیلئے نیشنل کمانڈ اینڈ آپریشن سینٹر نے اہم اقدام اٹھاتے ہوئے ملک بھر میں شاپنگ مالز، دکانیں اور مارکیٹیں رات 10 بجے بند کرنے کا فیصلہ کیا ہے ، جس کا اطلاق آج سے ہو گا۔

این سی او سی کی جانب سے جاری احکامات کے مطابق ملک بھر میں تمام شادی ہالز اور ریسٹورنٹس بھی رات 10 بجے بند کر دیئے جائیں گے۔

 تفریح گاہیں اور پارک بھی شام 6 بجے بند کرنے کا فیصلہ کر لیا گیا ہے۔

 میڈیکل سٹورز، کلینک اور ہسپتال اس پابندی سے مستثنیٰ ہونگے اور کھلے رہیں گے۔

 ماسک پہننا بھی لازمی قرار دیا گیا ہے۔

این سی او سی کی جانب سے جاری بیان میں کہا گیا ہے کہ خلاف ورزی پر بھاری جرمانہ عائد ہوگا۔

واضح رہے کہ پاکستان میں کورونا وائرس کی وجہ سے مریضوں کی تعداد اور ہلاکتوں میں بتدریج اضافے کے بعد حکومت نے پابندیاں لگانے پر غور شروع کر دیا ہے۔