سندھ اسمبلی میں قائد حزب اختلاف فردوس شمیم نقوی نے کہا ہے کہ سندھ حکومت نے ناجائز ذخیرہ اندوزی کی ہے اس لئے صوبے میں قیمت بڑھتی ہیں تو ذمہ دار وزیراعلی ہیں۔

تفصیلات کے مطابق سندھ اسمبلی میں قائد حزب اختلاف فردوس شمیم نقوی نے انصاف ہاوس میں پریس کانفرنس سے خطاب کرتے ہوئے کہا ہے کہ اپوزیشن پارٹیوں کے رہنما بوکھلاہٹ کا شکار ہو چکے ہیں۔

اپوزیشن رہنما کس منہ سے تحریک کی بات کررہے ہیں،ان کا مقصد صرف اپنی کرپشن بچانا ہے۔

فردوس شمیم نقوی کا کہنا تھا کہ صوبے میں قیمت بڑھتی ہیں تو ذمہ دار وزیراعلی ہیں،سندھ حکومت نے ناجائز ذخیرہ اندوزی کی۔وزیر اعلی کے قول اور فعل میں تضاد ہے۔ایک طرف کہتے ہیں کہ کورونا کیسز بڑھ رہے ہیں اور دوسری جانب جلسہ کرنا چاہتے ہیں۔

ان کا کہنا تھا کہ اپوزیشن کا مقصد صرف اپنی کرپشن بچانا ہہے لیکن اپوزیشن جتنے چاہے ہتھکنڈے استعمال کر لے وزیر اعظم اور پی ٹی آئی حکومت کے خلاف ان کا ہر اقدام ضائع جائے گا۔

فردوس شمیم نقوی نے مزید کہا کہ18 ویں ترمیم کے تحت اجناس کی فراہمی صوبائی حکومت کی ذمہ داری ہے اور صوبے میں قیمت بڑھتی ہیں تو ذمہ دار وزیراعلی ہیں، اگر صوبائی حکومت گندم وافر مقدار میں فراہم کردیں تو قیمتوں میں اضافہ نہیں ہوگا۔

ان کا کہنا تھا کہ سندھ حکومت کا پرائس کنٹرول ڈپارٹمنٹ کام نہیں کررہا اگر کہیں منافع خوری ہورہی ہے تو اس کو روکنا ڈپٹی کمشنر، اسسٹنٹ کمشنر اور پرائس کنٹرول ڈپارٹمنٹ کا کام ہے۔