ترجمان دفتر خارجہ زاہد حفیظ چوہدری کا کہنا ہے کہ پاکستان بھارت کو عالمی سطح پر بے نقاب کرتا رہے گا۔

تفصیلات کے مطابق  مقبوضہ کشمیر کے ضلع ناگروٹا میں نام نہاد دہشت گردی کے حملے کے حوالے سے بھارتی وزارت خارجہ کی غیرملکی سفیروں کو بریفنگ پر ترجمان دفتر خارجہ  نےرد عمل دیتے ہوئے کہا کہ  پاکستان نے پاکستان مخالف بھارتی ریاستی دہشت گردی، منصوبہ بندی،معاونت، مالی اعانت اور عملدرآمد کے ناقابل تردید ثبوتوں پر مشتمل  ڈوزیئر عالمی برادری کے سامنے  رکھا ہے۔

زاہد حفیظ چوہدری نے کہا کہ  پاکستان کی جانب سے پیش کیے گئے ڈوزئیر کے بعد بھارتی حکومت نے پاکستان مخالف مہم کو تیز کر دیا ہے۔ بھارتی وزارت خارجہ کی غیرملکی سفیروں کو بریفنگ پاکستان کے خلاف پراپیگنڈا کی ایک اور ناکام کوشش ہے۔

انہوں نے مزید کہا کہ  پاکستان کے خلاف بھارتی جھوٹا بیانیہ مقبوضہ کشمیر میں ریاستی دہشت گردی سے توجہ ہٹانے کے سوا کچھ نہیں ہے۔ پاکستان نے عالمی برادری کو بھارت کے ایسے اقدامات کے حوالے سے پہلے ہی سے آگاہ کر رکھا ہے۔

ترجمان دفتر خارجہ نے کہا کہ  بھارت پاکستان کو بدنام کرنے کے لیے فالس فلیگ آپریشن جیسے اقدامات اٹھا سکتا ہے۔

زاہد حفیظ چوہدری نے کہا کہ پاکستان بھارت کو عالمی سطح پر بے نقاب کرتا رہے گا۔ پاکستان بھارتی بے بنیاد پراپیگنڈے سے عالمی برادری کو گمراہ نہیں ہونے دے گا۔

ان کا کہنا تھا کہ اقوام متحدہ اور عالمی برادری کو پاکستان کے پیش کردہ ڈوزئیر پر ایکشن لینا چاہیے۔