ایران کے وزیر خارجہ محمد جواد ظریف کل پاکستان پہنچیں گے۔

ذرائع کے مطابق  ایرانی وزیر خارجہ محمد جواد ظریف پاکستان  کے دو روزہ سرکاری دورے پر کل پاکستان پہنچیں گے۔

ذرائع کا کہنا ہے کہ  ایرانی وزیر خارجہ کے ہمراہ ایک اعلیٰ سطح کا وفد بھی اسلام آباد پہنچے گا۔  ایران کے نمائندہ خصوصی برائے افغانستان محمد ابراہیم طاہریان بھی جواد ظریف کے ہمراہ ہوں گے۔

ذرائع کا مزید کہنا ہے کہ ایرانی وزیر خارجہ جواد ظریف کے ہمراہ پاکستان آنے والا وفد سیاسی اور اقتصادی سطح کا ہے۔

ذرائع کے مطابق  ایرانی وزیر خارجہ دورہ پاکستان میں صدر مملکت ڈاکٹر عارف علوی،وزیر اعظم عمران خان ،آرمی چیف جنرل قمر جاوید  باجوہ اور اسپیکر قومی اسمبلی اسد قیصر سے سے ملاقاتیں کریں گے۔

ملاقاتوں میں باہمی تعلقات،افغانستان میں قیام امن،افغان امن عمل،پاک ایران اقتصادی تعلقات،پاک ایران سرحدی انتظامی امور اور غیر قانونی منشیات و انسانی اسمگلنگ پر تبادلہ خیال کیا جائے گا۔