پشاور میں پی ڈی ایم کا پاور شو آج ہوگا ، پشاورمیں پی ڈی ایم کے جلسے پر پابندی کے باوجود میدان سج گیا، تیاریوں کو حتمی شکل دی جارہی ہے۔

تفصیلات کے مطابق پی ڈی ایم جلسے کے پیش نظر سٹی ٹریفک پولیس کا ٹریفک پلان سامنے آگیا ہے۔

چیف ٹریفک آفیسرعباس مجید مروت کے مطابق پشاورضلع میں صبح سے لیکر رات تک بڑی گاڑیوں کا داخلہ ممنوع ہوگا، جلسہ کے باعث پیر زکوڑی پل سے چارسدہ روڈ تک رنگ روڈ بند ہوگا۔

ٹریفک چیف پشاور کے مطابق رش اور سڑکوں کی بندش کے باعث عوام کے لئے متبادل روٹس کا انتظام کیا ہے، اسلام آباد سے آنے والے افراد مردان رشکئی انٹرچینج پر اتر کر نوشہرہ جی ٹی روڈ کا راستہ استعمال کریں۔

چارسدہ نیستہ انٹر چینج پراتر کر پشاور میں داخل ہونے کیلئے چارسدہ روڈ کاراستہ

جنوبی اضلاع کی گاڑیاں فرنٹئیر روڈ متنی سے سربند اور باڑہ روڈ کے راستے رنگ روڈ کے زریعے پشاور میں داخل ہوں۔

چیف ٹریفک آفیسر کے مطابق پشاور میں داخل ہونے کیلئے کوہاٹ روڈ سیفن چوک سے پی اے ایف روڈ،رنگ روڈ اور عمر گل روڈکا راستہ استعمال کریں۔

واضح رہےکہ پشاورجلسہ گاہ کے اطراف میں موبائل سروس جزوی بند کر دی گئی ہے جبکہ جلسہ گاہ کو جانے والے مختلف روڈ بھی بند ہیں۔

ذرائع کے مطابق دلزاک روڈ،رنگ روڈ اور دیگر سڑکیں بند کر دی گئیں ہیں۔

 سربراہ پی ڈی ایم مولانا فضل الرحمان اور مسلم لیگ ن کی نائب صدرمریم نوازسمیت پاکستان پیپلز پارٹی کے چئیرمین بلاول بھٹو اور دیگر قائدین خطاب کریں گے۔

ذرائع کے مطابق پشاورمیں انتظامیہ نے پی ڈی ایم کو تو جلسے کی اجازت نہیں دی لیکن کبوتر چوک میں جلسے کےلیے میدان سج گیا ہے۔

جلسہ گاہ میں 50 ہزارکرسیاں لگائی جائیں گی، 8 فٹ اونچا اور32 فٹ چوڑا اور120 فٹ لمبا اسٹیج بھی تیار کرلیا گیا ہے۔

پشاورمیں پی ڈی ایم جلسے کےلیے 4 ہزار سے پولیس افسران واہلکارامن وامان کی ڈیوٹی سرانجام دینگے، جبکہ جے یو آئی کے انصار الاسلام کے دستے بھی تعینات ہوں گے، اے این پی کے رہنماء بھی سرخ لباس میں شرکت کریں گے۔

صبح 11 بجے ہونے والے جلسے کے لیے دلزاک روڈ چوک کو پوسٹر اور بینرز سے سجادیا گیا ، جلسے سے پہلے رات کو آتش بازی بھی کی گئی۔

سربراہ پی ڈی ایم مولانا فضل الرحمٰن کا کہنا ہے کہ ناجائزحکمراں بذات خود کورونا ہیں، ملک میں ناجائز حکومت کے خلاف تحریک جوبن پر ہے، ایک ٹرمپ چلا گیا، اب پاکستانی ٹرمپ کو بھی چلتا کریں گے۔

انہوں نے کہا کہ آج پشاور میں تاریخی جلسہ ہو کر رہے گا، عوام کے ووٹ چوری کرنے والوں کو آرام سے نہیں بیٹھنے دیں گے۔

اس سے قبل وزیراعظم عمران خان نے ایک ٹویٹ میں کہا تھا کہ عوامی تحفظ کے معاملے پر غیر ذمہ دارانہ سیاست کی جا رہی ہے، اپوزیشن ایسے وقت جلسے کرنے پر بضد ہے جب کورونا پھیل رہا ہے۔

مولانا فضل الرحمان نے پشاور میں پریس کانفرنس کرتے ہوئے مزید کہا کہ پشاور میں تاریخی جلسہ ہوگا جسے دیکھ کر حکومت کے ہوش اڑیں گے۔

دوسری جانب وزیراعظم عمران خان نے پاکستان ڈیموکریٹک موومنٹ کے رہنماؤں پر تنقید کرتے ہوئے کہا ہے کہ یہ وہی پی ڈی ایم ہے جو سخت لاک ڈاؤن چاہتی تھی، پہلے یہ حکومت پر تنقید کرتے تھے، اب لوگوں کی صحت کے ساتھ لاپروائی کا سیاسی کھیل کھیل رہے ہیں۔

وزیراعظم کا کہنا ہے کہ کورونا پر عدالتی فیصلے کی حکم عدولی کی جارہی ہے، جلسہ ایسے وقت کیا جارہا جب کورونا کیسز تیزی سے بڑھ رہے ہیں۔