بلاول بھٹو کا کہنا ہے کہ گلگت بلتستان کو تباہی سے بچانا ہے تو پیپلزپارٹی کا ساتھ دیں۔ 

تفصیلات کے مطابق چیئرمین پیپلزپارٹی بلاول بھٹو نے گلگت بلتستان کے ضلع استور میں انتخابی جلسے سے خطاب کرتے ہوئے کہا کہ صدر زرداری نے 2009 میں عبوری صوبہ دے دیا تھا، آپ ابھی تک گلگت بلتستان صوبے کا سوچ رہے ہیں، عمران خان سوچ رہے ہیں گلگت بلتستان کو صوبہ بنا دیں، یہ بھی بڑی خبر ہے کہ سلیکٹڈ سوچ رہے ہیں، سلیکٹڈ کو گلگت بلتستان کے بارے میں کیا پتا۔

انھوں نے کہا کہ استور کے لوگ جیت چکے ہیں اور استورکا بچہ بچہ کہہ رہا ہے کہ پیپلز پارٹی کا ساتھ دیں گے،گلگت بلتستان کو تباہی سے بچانا ہے تو پیپلزپارٹی کا ساتھ دیں، آپ ان سے پیسہ ضرور لیں لیکن ووٹ تیر کو دیں، کٹھ پتلی وزیراعظم کو بھی الیکشن کے دنوں میں گلگت بلتستان کا خیال آجاتا ہے، سلیکٹڈ وزیراعظم کہتے ہیں الیکشن کی وجہ سے پیکج کا اعلان نہیں کر رہا، ہم آپ کو جانتے ہیں، الیکشن کے بعد بھی پیکج نہیں دیں گے، آپ نے تو میانوالی کو بھی پیکج نہیں دیا ہے، صوبہ بناؤں گا اور سبسڈی کا بھی تحفظ کروں گا

مزید پڑھیں

حکومت کو آخری دھکا گلگت بلتستان کی عوام ہی لگائے گی ،مریم نواز

مسلم لیگ ن کی رہنما مریم نواز گلگت بلتستان پہنچ گئیں ہیں...

بلاول بھٹو نے کہا کہ بڑے بڑے لوگوں کو ایمنسٹی دے کر معیشت ترقی نہیں کرسکتی، بینظیر انکم سپورٹ پروگرام کی طرح منصوبوں سے ترقی ہوتی ہے، جو پاکستان میں ہو رہا ہے وہ آپ کے سامنے ہے، ہر طبقہ سراپا احتجاج ہے، مزدوروں سے لے کر تاجر تک احتجاج کر رہے ہیں، عوام کو تبدیلی کے نام پر تباہی سے بچانا ہے، ہم جمہوری طریقے سے اپنی مہم چلا رہے ہیں، ان کے پاس اقتدار ضرور ہے لیکن عوام ان کے ساتھ نہیں ہیں۔

چیئرمین پیپلزپارٹی نے کہا یہ تو صوبہ بنانے سے پہلے ٹیکس کے نوٹیفکیشن نکال رہے ہیں، ہم گلگت کے ہر گلی، محلے اور گھروں میں جا رہے ہیں اور ہم گلگت کی عوام کے لیے وہ کام کریں گے جو تاریخ یاد رکھے گی، استورکی عوام نے جلسے کے ذریعے اپنا فیصلہ سنا دیا۔

جلسے کے شرکا کو مخاطب کرتے ہوئے بلاول بھٹونے مزید کہا کہ ماضی میں آپ نے ساتھ دے کر ایف سی آر کا خاتمہ کیا، ہم نے تنخواہوں اور پنشنز میں اضافہ کیا لیکن انہوں نے تنخواہوں میں ایک ٹکے کا بھی اضافہ نہیں کیا ہے۔