مسلم لیگی رہنما مریم نواز کا کہنا ہے کہ ایک ماں ہونے کے ناطے شہید بچوں کی ماؤں کے غم کو سمجھ سکتی ہوں۔

تفصیلات کے مطابق مسلم لیگ ن کی مرکزی نائب صدر اور سابق وزیراعظم نواز شریف کی صاحبزادی مریم نواز نے آرمی پبلک سکول پشاور کے شہداء کی برسی کے حوالے سے کہا کہ آرمی پبلک اسکول کے بچوں کی شہادت کا یہ دن ہر سال ہمارے دلوں پر لگے گہرے زخموں کو تازہ کردیتا ہے۔

مریم نواز شریف نے سانحہ اے پی ایس کے شہداء کو خراج عقیدت پیش کرتے ہوئے کہا کہ اللہ تعالی متاثرہ خاندانوں خاص طور پر شہید بچوں کے والدین کو یہ صدمہ برداشت کرنے کی ہمت اور توفیق عطا فرمائے۔

مسلم لیگی رہنما نے کہا کہ پوری قوم نے ہر تقسیم مٹا کر دہشت گردی کو جڑ سے اکھاڑ پھینکنے کا قومی فیصلہ کیا، سانحے میں بچوں اور اساتذہ سمیت تمام شہدا کے درجات کی بلندی کی دعا کرتے ہیں۔

سانحہ اے پی ایس پشاور

 سانحہ اے پی ایس پشاور کو 6 سال بیت گئے مگر اپنے خون سے علم کے دیے جلانے والے دلوں میں وہ سارے معصوم شہید آج بھی زندہ ہیں۔

سانحہ اے پی ایس شہداوں کی یاد میں بڑوں کے ساتھ ساتھ بچے بھی افسردہ  نجی سکول کے ننھے منے بچوں نے شاعری کرتے ہوئے اپنے معصومانہ انداز میں شہدا کو خراج عقیدت پیش کیا جبکہ اس سانحے پر قوم کے زخم آج بھی تازہ ہیں، شہدا کے لواحقین آج بھی غم سے نڈھال ہیں، مگر حوصلے جوان ہیں۔

سانحہ اے پی ایس کا دلخراش واقعہ 16 دسمبر 2014 کو پیش آیا جب صبح طلباء علم کے حصول کے لیے گھر سے اسکول گئے تھے، وہ ابھی اسکول میں علم کی شمع سے روشناس ہورہے تھے کہ 10 بجے کے درمیان 7 دہشت گرد اسکول کے اندر داخل ہوئے اور معصوم طلباء سمیت پرنسپل اور دیگر افراد کو بے رحمی سے شہید کیا۔

یہ وہ دن تھا جس کا سورج حسین تمناؤں اور دلفریب ارمانوں کے سنگ طلوع ہوا مگر غروب 132 معصوم و بے قصور بچوں کے لہو کے ساتھ ہوا تاہم یہ وہ سانحہ تھا جس نے ہر محب وطن پاکستانی کو دلگیر و اشکبار کیا۔

16 دسمبر 2014 کو  اے پی ایس پشاور لہو لہو ہوا تو ملت پاکستان نے بھی رب ذوالجلال کو گواہ بنا کر یہ عہد کر لیا کہ جب تک عرض پاک سے آخری دہشت گرد کا خاتمہ نہ ہو جائے حق و باطل اور بقا و فنا کی یہ جنگ جاری رہے گی۔