وزیر خارجہ شاہ محمود قریشی کا کہنا ہے کہ  وزیر اعظم عمران خان نے عوام الناس کو انصاف کی فراہمی ان کی دہلیز پر مہیا کرنے کا وعدہ ’وزیر اعظم سٹیزن پورٹل‘کے ذریعے پورا کیا ۔

تفصیلات کے مطابق وزیر خارجہ شاہ محمود قریشی  نے وزیر اعظم سٹیزن پورٹل کے دو سال مکمل ہونے پر وزیر اعظم عمران خان کو مبارکبادپیش کرتے ہوئے کہا کہ  یہ وہ تبدیلی ہے جس کا وعدہ وزیر اعظم عمران خان اور تحریک انصاف نے قوم کے ساتھ کیا تھا ۔

وزیر خارجہ نے کہا کہ  مجھے خوشی ہے کہ وزارت خارجہ نے وزیر اعظم سٹیزن پورٹل پر موصول ہونے والی شکایات کے بروقت ازالے میں بہترین کارکردگی کا مظاہرہ کیا ۔

شاہ محمود قریشی نے کہا کہ  کورونا عالمی وبائی چیلنج کے دوران ہم نے دنیا بھر میں مقیم پاکستانیوں کی معاونت  کے لیے 24/7 بنیادوں پر کرائسز سینٹر قائم کیا اور وطن واپسی کے منتظر لاکھوں تارکین وطن کو واپس لانے میں معاونت کی ۔

انہوں نے مزید کہا کہ  دنیا بھر میں ہمارے سفراء نے، محدود معاشی وسائل کے باوجود، دل کھول کر پاکستانی کمیونٹی کی معاونت کی۔

وزیر خارجہ نے کہا کہ پاکستانی کمیونٹی نے سوشل میڈیا پر ویڈیو پیغامات کے ذریعے پاکستانی سفارت خانوں کے کردار کی تعریف کی اور ان کی کارکردگی کو سراہا ۔

شاہ محمود قریشی نے کہا کہ  وزارت خارجہ کے افسران نے ایک دفعہ پھر ثابت کیا ہے کہ لگن سچی ہو اور خدمت خلق نصب العین ہو تو کامیابی ضرور حاصل ہوتی ہے ۔

انہوں نے کہا کہ  میں اس کامیابی پر سیکرٹری خارجہ سہیل محمود اور وزارت خارجہ کی پوری ٹیم کو دل کی گہرائیوں سے مبارکباد پیش کرتا ہوں ۔