وفاقی کابینہ نے چھٹی مردم شماری کے نتائج جاری کرنے کی منظوری دے دی۔

تفصیلات کے مطابق  وزیر اعظم عمران خان کی زیر صدارت وفاقی کابینہ کا اہم اجلاس ہوا۔

اجلاس میں ملکی سیاسی، معاشی اور کورونا کی صورتحال کا جائزہ لیا گیا۔

کابینہ نے مردم شماری سے متعلق ایم کیو ایم کا اختلافی نوٹ شامل کرکے مردم شماری پر وزراء کی رپورٹ منظورکرلی۔

ایم کیو ایم کے رہنما و وفاقی وزیر امین الحق نے  2017 کی مردم شماری کو مسترد کرتے ہوئے کہا کہ  نئی مردم شماری فوری طور پر کروائی جائے۔

وفاقی کابینہ نے مردم شماری پر وزراء کی رپورٹ منظورکرتے ہوئے  چھٹی مردم شماری کے نتائج جاری کرنے کی منظوری  بھی دے دی۔

اجلاس میں فیصلہ کیا گیا کہ مردم شماری کے نتائج جاری کرنے کا معاملہ مشترکہ مفادات کونسل میں پیش ہوگا، مشترکہ مفادات کونسل حتمی منظوری دے گی۔

کابینہ نے اقتصادی رابطہ کمیٹی کے 16 دسمبر کے فیصلوں کی  بھی توثیق کردی۔

کابینہ اجلاس میں نیپرا کی سال 2019-20 اور اسٹیٹ انڈسٹری رپورٹ 2020  پیش کی گئی۔

اجلاس میں  مارگلہ روڈ اسلام آباد پر تجاوزات سے متعلق کابینہ کے فیصلے پر عملدرآمد رپورٹ پیش کی گئی۔

کابینہ نے یوٹیلیٹی اسٹور کارپوریشن کے ملازمین پر لازمی سروسز ایکٹ کی توسیع دےدی۔ سی ڈی اے آرڈیننس 1980 میں ترمیم کی بھی منظوری دے دی گئی۔

ایس ٹی ای ڈی ای سی کے ایم ڈی کی تقرری کردی گئی۔ کابینہ نے نیشنل انسٹیٹیوٹ آف بحری سائنس کے ڈی جی کی تقرری اور  زرعی ترقیاتی بنک کے بورڈ کی تشکیل نو کی  بھی منظوری دےدی گئی۔

کابینہ اجلاس میں سرمایہ کاری بورڈ کی تشکیل نو کی  بھی منظوری دی  گئی۔کابینہ نے ٹربائن فیول ایوی ایشن ہائی فلیش کی امپورٹ کی بھی  منظوری دےدی۔

وفاقی کابینہ نے الیکٹرک وہیکل پالیسی اور  موبائل مینوفیکچرنگ پالیسی کی بھی منظوری دے دی گئی۔

اجلاس کے دوران ملکی امپورٹ اور ایکسپورٹ کی صورت حال پر بھی بریفنگ دی گئی۔